Actualités

 Alatsinain’ny paska omaly, fotoam-pitsangantsanganana, ka dia nanatanteraka izany ara-bakiteny ny mponina. Toa adinon’ny olona fa ao anaty fotoan-tsarotra noho ny fipariahan’ny valanaretina coronavirus i Madagasikara, ary isan’ny tena lasibatra ny Faritra Antsinanana. Vao ny sabotsy 03 aprily lasa teo no nambaran’ny Filoham-pirenena fa mihatra eto amin’ny tanin’ny Repoblikan’i Madagasikara ny hamehana ara-pahasalamana, voarara ny fivorivoriana mihoatra ny 100,… Ny mpitondra sy manam-pahefana no mpamerin-doha ny vahoaka eo anatrehan’ny goragora sy ny tsy fanajana ny fisipika. Tsy resy lahatra sy tsy mino izay lazain’ny mpitondra intsony ve ny olona? Tsy mipetraka intsony ve ny fahefam-panjakana matoa tsy misy manaja ny fitsipika hapetraka? Mbola tsy tonga saina foana ve ny vahoaka fa aretina mandripaka sy mamono vetivety no mandindona ny isam-batan’olona? Antony iray mampiparitaka ny valanaretina ny fitangoronana tahaka ireny, ary tsy tany Toamasina ihany, fa ny toerana sasany teto Antananarivo aza nahitana fitangoronana be toy ny teny amin’ny By Pass. Ny mpitondra sy ny manampahefana manam-bola sy afaka mitsabo tena any ivelany, fa ny vahoaka minia tsy mihaino no sanatriavina hizaka ny taolam-be tsy mitapaka, ka entanina hatrany hitandrina.

Toky R