Actualités

 Fitaterana tsy ara-dalàna sy vono olona an-kolaka no hanenjehana azy ireo. Miisa 12 izy ireo no niakatra fampanoavana tao Nosy Be ny talata teo, ka ny 10 ireo nidoboka any am-ponja ireo, ary ny 2 izay tsy ampy taona kosa dia arahi-maso ara-pitsarana. Tsiahivina, fa ny 2 novambra lasa teo no hita teny an-dranomasina izy ireo, olona 16 teo tao tao anatin’ny sambokely iray izay voalaza fa nisy fahasimbana, efa tena reraka sy mosarena satria tsy nisy hanin-ko hanina. Efa ny 23 oktobra rahateo no voalaza fa niainga avy tao Ambanja, saingy nihitsoka teny afovoan-dranomasina. Voalaza fa 20 no tao anatin’ny sambokely, saingy matin’ny hanohanana ny 4 ka nisy natsipy tany anaty rano. Razana iray sisa no tao anatin’ny sambokely tamin’ny fotoana nampiakaran’ny tafika an-dranomasina azy ireo an-tanety. Tsiahivina hatrany, fa tsy vao tranga voalohany tamin’ny fiondranana an-tsokosoko ity sarona ity. Ny tena nitovitovy tamin’io dia ilay tamin’ny oktobra-novambra 2020, nisiana sambokely simba teny afovoan-drano, ka olona miisa 8 tamin’ireo mpandeha 21 tao anatiny no maty ary natsipy tany anaty rano. Tato anatin’ny roa volana, tsy latsaky ny 100 ny olona sarona tamin’ny fiondranana an-tsokosoko, ka nisy mbola taty amin’ny fari-dranomasin’i Madagasikara ary nisy efa tonga tany Mayotte.
Toky R