Actualités

Isan’ny tena manimba izany ny resaka tambazotran-tserasera, hoy ny filoha lefiny, Gerard Ramamimampinona. Miezaka izahay noho izany satria rehefa hifampitaiza ve, ohatra, ny olona dia mbola hahazo vahana be toy izao ny fifanaratsiana anaty tambazotran-tserasera? Ilay olombelona mihitsy no mila mifampitaiza sy mametraka amin’ny toerany ireo ray aman-dreny saingy miteny na izany na tsy izany aza izahay hoe tandremo fa mandrava fiarahamonina ny tambazotran-tserasera! Olona mbola tsy mihaona akory efa miady sahady ao anatiny ao. Ny Malagasy mifampiresaka izany dia fifanajana, vahaolana, marimaritra iraisana sy ny karazany fa amin’izao mifanompa, mifanalika, mifanebaka, mifampisoloky. Ny raiamandreny tokony hanome ohatra tsara indray no mampiady. Na raiamandreny anaty fiangonana aza. Ireny koa izao hitantsika ireny raiamandreny mpampianatra sy raiamandreny olomboafidy miady eny imasom-bahoaka nefa tokony hifanome haja sy hasina. Fiteny ny hoe “Tany misy olobe tsy miady zaza.”. Ny antsika efa miady mbola entina any Maputo sy Dakar dia hoe ireto ankolafy Ravalo, ankolafy Rajoelina, ankolafy Ratsiraka, etsetra. Lalaovin’olona ny raiamandrenintsika ary ry zareo mihitsy no entina any amin’ny ady. Amin’io hoe aty isika no miady dia any Maputo sy Dakar ny olona no mandravina azy. Henatra ho an’ny firenena izany ary tokony hahatonga saina antsika, hoy hatrany ny tenany.
J. Mirija