Manomboka miparitaka ny aretina ka tokony samy ho mailo ny rehetra mba tsy sanatria hidirana amin’ny fihibohana indray. Ho an’ny taxibe ohatra dia tokony hajaina tsara ilay olona 4 isaky ny laharana fa tsy asiana seza afovoany toy ny fepetra efa noraisina hatramin’izay. Fadiana ihany koa ny mitondra ireo mpandeha tsy manao aron-tava, tokony hofendrahina ranom-panafody isan’andro ny taxibe hamonoana ny otrik’aretina, ankoatra ny fampiasana gel desinfectant raha vantany vao miditra eo am-baravarana. Tokony hanao aron-tava sy visière ihany koa ny resevera hisorohana ny fipitihan’ny piti-drora. Afaka fotoana fohy mantsy dia hiditra amin’ny vanim-potoanan’ny ririnina indray isika eto Madagasikara ka ahiana mafy ny mety ho firongatry ny aretina raha sanatria ka tsy mitandrina isika mianakavy. Manampy trotraka izany ny mety hahatapahan’ny asa fitadiavam-bola maro isan-karazany raha sanatria ka misy ny fihibohana ka vao mainka ho lalina ny fahasahiranan’ny isam-baravarana.
Pati