momba ny judo no namoahan’ny Depiote Siteny Andrianasoloniaiko, ny fanaovana vaksiny hiadiana amin’ny coronavirus. Ity Depiote voafidy tany Toliara tamin’ny anaran’ny IRD ity izany no manam-pahefana Malagasy voalohany naneho ampahibemaso ny fanaovany vaksiny, izay nambarany fa tsy an-tery. Namoaka horonan-tsary momba ny hanaovany vaksiny ihany koa ny depiote Voninahitsy Jean Eugène. Nandray fiaramanidina nankany Lafrantsa ny sabotsy teo ny tenany. Sady mitsidika fianankaviana no hanararaotra hanao vaksiny, hoy I Voninahitsy Jean Eugène. Iray volana eo no hijanona any, ary tiako hazavaina, fa salama tsara aho no niala tao Madagasikara. Tsy maintsy manao fitiliana coronavirus, ary voamarina fa “negatif”, hoy izy. Mikasika ny fitsaboana sy fiarovana dia naneho hevitra izy, fa tsy mahahalala an’I Dr Edmond Rakotomalala, fa izao fotsiny hoe ny fanafody vokariny dia fantatro, ny olona mijoro vavolombelona haiko, fa hoe tena mahasitrana. Ny olona nanao ilay izy no mijoro vavolombelona sy manao doka ho azy, fa tsy izy no manao dokam-barotra amin’ny zavatra vokariny, hoy I Voninahitsy, izay naneho fa tsy misy mahasamihafa an’io amin’ny CVO, ka tsy tokony hanaovana mizana tsindrian’ila.
MBOLA BARAINGO NY MOMBA AN’I MADAGASIKARA
Any ivelany izany no manao vaksiny ireo Malagasy manana fahafahana manao izany satria mbola tsy nampiditra izany ny Fanjakana. Ny 20 martsa dia nanao angoan-tenda sy teny toa tsy ampiheverana ny Filoha Rajoelina, fa ny mpanohitra no hataon’izy ireo vaksiny voalohany. Ny 03 aprily, nilaza fa tsy maintsy atao izay fomba rehetra hiarovana ny Malagasy, ary vaksiny roa no nambara fa efa mahafeno fepetra. Ny mpilatsaka an-tsitra-po, ny mpitandro filaminana, ny mpiasan’ny fahasalamana, ary ny zokiolona no laharam-pahamehana raha ny nambarany tamin’io. Tsiahivina, fa nifarana ny 7 desambra ny fisoratana anarana tao anatin’ny “Alliance Covax” hanamorana ny fisitrahana vaksiny ho anny tany mahantra, raha toa ka taty amin’ny 26 martsa vao nametraka taratasy firotsahana ho ao anatiny ny Fanjakana Malagasy. Maro ny firenena efa manao saingy ny an’i Madagasikara kosa mbola tsy hay noho ny hambo-po diso toeran’ny Fanjakana.
Toky R