.jpg)
Manana taha-pahombiazana hatramin’ny 82,4% moa izy ity ho fiarovana amin’ny valanaretina Coronavirus efa nandalo teto Madagasikara, raha ny fanazavan’ireo mpikaroka sy mpitsabo. Izany hoe, laharana fahadimy amin’ireo karazam-bakisiny miisa 8 natao hiadiana amin’ny aretina Covid 19 hita hatreto. Tsiahivina hatrany fa raha ny vokatra santatra tamin’ireo andrana klinika natao hatreto dia ny vakisiny Pfizer & BioNTech niarahan-drizareo Amerikanina sy alemanina nikaroka izany no manana izay taham-pahombiazana na “taux d’efficacité” ambony indrindra hiadiana amin’ny Covid 19 izay satria dia 95% izany taha izany. Manaraka azy ny Moderna Amerikanina, 94,5%. Fahatelo ny Sputnik V an’ny Rosianina, 91,6%. Ny Novavax, izay mbola an’ny Amerikanina hatrany no fahahefatra, 89%. Ny fahadimy moa dia ilay voalaza teo dia ny Covishield, izay iray lasitra amin’ny Astra Zeneca an-drizareo Anglisy sy Soedoa fa nadikan’ny indianina, 82,4%. Ny Sinopharm an-drizareo Sinoa no fahaenina, 79%. Aty amin’ny laharana fahafito vao ahitana ny Jhonson & Jhonson an-drizareo Amerikanina hatrany, 72%. Ny Coronavac an’ny sinoa kosa no zara raha manana taham-pahombiazana 50% amin’izy rehetra ireo. Voalaza fa sisam-bakisiny avy any Congo moa ny Covishield nalefa teto Madagasikara farany teo, raha ny fampatsiahivana nataon’ny mpandinika raharaham-pirenena, Tintin Ravonison, azy. Ny ambany kalitao amin’ireo vaksiny misy hatrany, araka izany, no hafarana eto, raha ireo voka-pikarohana no jerena.
J. Mirija
