Edito

 Etsy ankilany dia mivoaka isan’andro ny lisitr’ireo mpitondra manana dosie na koa hamoahana dosie izay nambaran’ny praiminisitra moa fa “tsy voatery ho marina”. Lasa miteraka adihevitra be koa anefa amin’izao fotoana izao ity voambolana hoe “tsy voatery ho marina” an’ny praiminisitra ity, indrindra moa fa notohizany tamin’ilay hoe “ianareo mpanao gazety koa azo atao an’ireny” dia araky ny mpanara-baovao ny tohiny. Toy ny milaza ve izany rehetra izany fa hatreo ny fanadihadiana momba ity resaka zava-mamoha henatra lazaina fa ataon’ireo mpitondra ity? Ireo zava-mamoha henatra aza moa izany no marimarina kokoa satria dia efa kely izany sisa izao dia ny atsasa-manilan’ireo mpikamban’ny governemanta no hita sy efa mitady ho tazana voasaringotra ao anatiny ao. Hita indray fa miakatra ny maripana politika eto amintsika ary dia hitombo indray izany ny fanahian’ireo vahoaka tsy mandady harona manomboka eto hoe hatraiza ny fijeren’ireo mpitondra azy ireo. Mbola misy ho antenaina amin’ny fitondrana izay hita ho tsy mifantoka loatra intsony afa-tsy amin’izay hitazomana ny sezany ve satria efa tapitra ny 6 volana tokony nanaovana ny tombana momba azy ireo na rehefa tsy izay dia efa mifantoka any amin’ny fifidianana ho avy ?
J. Mirija