Edito

Ny rehetra no afaka misaintsaina ny tena zava-misy, fa raha handray ohatra vitsivitsy, dia tena mbola lavitry ny kitay ny afo. Tantsaha ny 80% amin’ny Malagasy fa na ny vary izay foto-tsakafontsika aza mbola hafarana any ivelany ny ampahany. Ny vahiny mpamatsy vola no manome toromarika antsika hamboly sy hiompy fa ho an’ny mpitondra miainga amin’ny filoha dia teleferika, tanamasoandro, kianja manara-penitra,.. no maika sy laharam-pahamehana. Ingahy filoha tenany mihitsy no tsy tahotra tsy henatra nilaza fa tsy afaka hiandry vary roa taona vao miakatra. Aty amin’ny herintaona tsy hialana amin’ny toerana maha filoha vao hoe: zava-dehibe ny fambolena sy ny fiompiana. Vita iny ny fety, hafaliana sy fety niserana niezahan’ny isam-batan’olona nanao izay mba namalifaliana ny ankohonana araka izay tratra. Miverina eo an-kianjan’ny olana indray isika ankehitriny. Olana maro sosona mana randran-tarihina, olana tsy tena misy vahaolana mafonja avy amin-dRafanjakana fa ny hany tena ataony dia manarontsarona an’ireny amin’ny kisehoseho ivelany, miezaka mitondra fifaliana mandalo,… fa indrindra manao fampanantenana manaka-danitra. Tato anatin’ny telo taona, mbola ny fampanantenana aloha betsaka, tsy adino ny fanilihana ny tsy fahaizana any amin’ny hafa, ary nofinofy izany Fanjakana tsara tantana izany ankehitriny, fa difotry ny kolikoly, afera maloto, fanodinkodinana volam-panjakana,… Mbola heverina fa hahomby sy handaitra hatrany ve ny fampatoriana mitsangana sy ny kajikajy hitazonana io fahefana mandalo io? Mbola hanaiky hampatoriana sy heverina ho mora fitahana hatrany ve ny vahoaka tsy mandady harona? Misy fetra ny zava-drehetra, ary izay nafafy tsy maintsy mbola hojinjaina na ho ela na ho haingana.
Toky R