Teren-ko masaka!

Ny zava-misy anefa efa iarahan’ny rehetra mahalala, hatramin’ireo mpamatsy vola sy mpampiasa vola eto amin’ity firenena ity, fa manjaka ny tsy fandriampahalemana. Kivy ianao nihaino ireo tsikera ara-diplaomatika nihatra tamin’ilay nosy malala nataon’ireo vondrona iraisampirenena niara-nivory tamintsika tao Genève, Soisa, farany teo. Na resaka fanajàna zon’olombelona na resaka fanajàna demokrasia na inona na inona dia izany no tena hoe tsy nahitàna mangirana na miabo azo noraisina fa dia fahamenarana sy finiavana hanongo tena no lasa nanery ny ankamaroan’ireo mpanara-baovao satria firenena iaraha-manana izy ity. Hita ho teren-ko masaka sisa ny fampandehanana ilay raharaha misy eto amin’ny firenena! Tsy misy mpisehatra politika sy mpamakafaka izay tsy velom-panontaniana amin’izao fotoana izao hoe inona ihany marina izany no tena politikam-pampandrosoana mba hananan’ity fitondràna ity sy kasainy hamahàna marina ny olana tena misy? Efa tena lany henatra ve? Ambom-po hanova famindra amin’ny fomba fiasa no heverina fa nandrasan’ny maro taorian’ireny fanakihanan’ny olona ity firenena ity ho mahantra indrindra eran-tany ireny kinanjo fidinginan-drambo, hoy ny fitenenana no nitranga. Ny fisian’ny fitohanan’ny fifamoivoizana aty an-drenivohitra, izay mampihisatra ny famokaràn’ireo olompirenena indray no nolazain’ny mpitantana sasany fa mariky ny fananan’ilay firenena harena. Sanatria ohatran’ny hoe mamoha fota-mandry moa rehefa miteny an’ilay saingy indrisy anefa fa zava-nisy ho raketin’ny tantara ireny.
J. Mirija