Edito

Na inona na inona lazaina matoa ny olompirenena mifidy olona iray na maromaro hitondra azy dia ny hampandrosoan’ireo olona ireo ny tenany sy ny tokantranony mihitsy aloha no tena andrasany. Na any amin’ireo firenen-dehibe aza dia izany no izy. Olombelona tsy nahita fivoarana teo amin’ny fiainany manokana no niteny nivantana ny filoham-pirenena frantsay ankehitriny, Emmanuel Macron, hoe “Tsy mbola nahita filoham-pirenena vendrana noho ianao aho!”. Hatezerana noho ny tsy fahitany ny fiantraikan’ilay fitantanana tany anaty vilaniny na fanaovan-tsakafony no nahatonga izany. Gaga ianao anefa rehefa maheno fanehoan-kevitra manohana ny fitondrana ankehitriny izay milaza hoe ny an’ny mpanohitra dia ny ati-vilany foana no resahany satria izay no mba hitany fa tsy hitany ireo foto-drafitrasa be dia be mitsangana isam-paritra. Mampahatsiahy ny fanontanian’ny mpamakafaka iray izay tsy mpanohitra fitondrana akory hoe nitondra inona tamin’ny toekarem-pirenena ary izao ny fitsanganana kianja manara-penitra miisa 30 ? Isany mameno ireo fotodrafitrasa tsy mitondra famokarana eto amin’ity firenena ity na ilay antsoina hoe “infrastructure non productive” fotsiny izany ireny amin’izao fotoana izao. Ny olana eto amin’ity firenena ity, izay ny ankamaroan’ireo ivelan’ny fitondrana fa tsy voatery ny mpanohitra ihany no mahita azy izao, dia ny tsy fandriampahalemana, ny tsy fahampian-tsakafo, ny tsy fanjarian-tsakafo izay mahamenatra ny maheno ho voasokajy ho isan’ireo firenena tsy manan-kohanina ankehitriny ny firenena misy ny tena, ny vidim-piainana miakatra, ny fahefa-mividin’ny ankamaroan’ny olompirenena miha mihena hatrany. “Ny vola miditra mihena, ny fandaniana mitombo na dia efa ezahana ahena aza!”. Firy isan-jaton’ny malagasy moa sisa izao no mbola mba tsy miaina izany toe-javatra izany ? Vahao ireo olana! Ireo tena olana!
J. Mirija