Na iza na iza fitondrana nandalo teo, samy mba nanao izay vitany, samy mba niasa araka izay mety tratrany sy ny fari-pahatakarany. Ny vokatra no mety ho tsy mitovy satria tao ny mety haingam-pandeha kokoa, tao no mety lasan-ko vavany toa haron-tabebaka,… Any amin’ny laharam-pahamehana sy ny vokatra eo amin’ny lafiny rehetra no hitarafana an’io fa tsy fisehosehoana manaka-danitra kanefa ny vokatra hita taratra amin’ny fiainan’ilay firenena tsy mba tsapan’ny olom-pirenena. Ny manahirana ankehitriny, dia efa tena lavitr’izany etika politika izany ny ankamaroan’ireo manampahefana manomboka any amin’ny faran-tampony. Tsy hanaiky ho diso mandrakizay fa hanadio tena mandrakiva, fatra-panenjika sy manakiana ny efa tsy eo, sasatry ny manilika ny tsy fahombiazana na tsy fihetezana any amin’ny mpifandrina, toa tsy mahatoky ny fahefana efa azo ka lany andro manenjika ireo heverina fa mety hisongona ny tena,… Raha tena mahatsapa tena ho niasa sy nahavita azy araka ny andrasan’ny vahoaka aminy ny Mpitondra tsy hanan-tahotra kely akory amin’ny hoavy. Terena ho ambadika politika izao zava-drehetra izao rehefa midona amin’ny rindrina kanefa mijabaka vokatry ny fahatokisan-tena diso tafahoatra, simba noho efa fiheveran-tena tsy ho maty manota satria miantehitra mafy amin’ny fahefana eo an-tànana ka ny hanao tsindry bokotra no masaka an-doha. Tsy manana etika sy deontolojia intsony, ka na efa migoka fahafaham-baraka aza tsy mba mahay mipitrapitra sy manetry tena fa mbola avo vava ihany. Betsaka ny mieritreritra fa misy ny “mandrakizay”, hany ka tsy mieritreritra hoe: mba ahoana no hiafarana? Misy fetrany ny zava-drehetra, ary misy foana ny mena ambonin’ny mena. Kodiaran-tsarety ny fiainana, ka ny ambony mety ho lasa ambany, ary ny ambany mety ho lasa ambony, ka fahadisoana be ny fiheverena fa tsy ho tratry ny aloka mihitsy na manao ny tsy mety aza. Tsy rehefa ianao akory no misioka satria ianao mety mieritreritra fa tompon’ny fahefana sy afaka manangan-tsandry hatreto dia voromanga foana, fa rehefa ny hafa dia vorondolo mandrakariva,
Toky R
Mihazakazaka any amin’ny fanenjehana ireo mpifanandrina ara-poto-kevitra aminy hatrany ny fitondrana,
Tonga indray ity ny vanim-potoanan’ny fifidianana