Fahasalamana

 raha ny fampitam-baovao voaray avy eo anivon’ny fikambanamben’ny mpitsabo nentim-paharazana tetsy Ivandry omaly. Misy rafitra ao anatin’ny sata mifehy ny fikambanana dia ny atao hoe BCRT na “Bureau de coordination regional des tradipraticiens”, hoy ny fanazavana. Andraikiny miaraka amin’ny manam-pahefana eo an-toerana ny mipetraka ho manam-pahefana hametraka amin’ny tokony ho izy, mampanara-dalana, manenjika ny manao ny tsy mety eo amin’ny tontolon’ny fitsaboana nentim-paharazana. Manara-maso isaky ny kaominina izy, hoy ny filohan’ny ANTM, Josephin Andriandrainarivo. Mamantatra hoe ranona no mpitsabo nentim-paharazana mipetraka eto. Rehefa tsy eo ilay mpitsabo dia mila fantany koa hoe maty sa nankaiza? Izy koa no mamaritra hoe migadra ireto satria nandika lalana. Hiaraka hifampidinika, noho izany, amin’io zoma 29 oktobra io ny manam-pahefana na solontenan’izy ireo toy ny governora sy ny DRCC, ny zandarimaria, ny polisim-pirenena, ny ANTM sy ny SPMT izay sampan-draharaha fampiasana zava-maniry fanao fanafody sy ny fitsaboana nentim-paharazana ao amin’ny minisiteran’ny fahasalamana, ny depiote sy ny maro hafa. Ny tanjona dia hoe efa misy ny lalana sy fitsipika rehetra mikasika ny fitsaboana nentim-paharazana saingy noho ny tsy mbola fipetrahan’io BCRT io isam-paritra eto Madagasikara, afa-tsy ao SAVA, dia ny filohan’ny ANTM irery no miteny sy manao izay tratrany amin’ny famahana ireo olana. Mila dinihina noho izany ny fahafahana mametraka izay birao fandrindrana isam-paritra, hoy hatrany ny fanazavana.
J. Mirija