Amin’ny alalan’iny ekografia iny mantsy raha araka ny fanazavan’ny dokotera Fidy Bariniaina no hahafantarana fa tena zaza ilay mipetraka ao an-kibo na fikorontanana fotsiny ihany na koa kista raha vantany vao tsy mandeha ny fadim-bolan’ny vehivavy iray. Rehefa ho teraka indray ny vehivavy iray hoy hatrany izy dia amin’ny alalan’ny ekografia ihany koa ny hahafantarana raha salama tsara no sady mitombo ilay zaza ao an-kibo nefa hita avy hatrany ihany koa raha sanatria misy olana. Anisan’ireny ohatra ny filoloavany ahitra izay tsy maintsy mandalo fandidiana ilay Reniny. Toraka izany koa ireo zaza be lohabe, ny zaza ngeza loatra izany hoe : 5 kg no miakatra… Ho an’ireo te-hahafantarana ny mahalahy na mahavavy ny zaza iray indray mba hahafahana mividy ny fitafiany dia fantatra fa eo anelanelan’ny fahadimy na fahaenim-bolan’ny kibo no hahafantarana izany. Antony tsy hahitana ny mahalahy na mahavavy ilay zaza kosa raha araka ny fanazavan’ny dokotera hatrany ny halehibiazany ka hanakombonany ilay feny. Amin’ny ankapobeny moa dia in-telo mandrapahateraka no tokony manao ekografia ny vehivavy bevohoka iray raha isam-bolana mihitsy no tokony ho izy. Tsiahivina moa fa mampihena ny taham-pahafatesan’ny Reny sy ny zaza eo am-piterahana ny fanaovana ekografia. Manomboka amin’ny 20.000 Ar ny manao azy ireny amin’izao ka hatramin’ny 40.000 Ar miankina amin’ilay toeram-pitsaboana.
Pati
