airtel

Fampianarana

03-mai-2024

Ankatso sy Vontovorona

Nangotraka ny fifandonana !

Sample post image

Mangotraka ny toe-draharaha eny amin’ny Anjerimanontolom-panjakana

03-mai-2024

Tsy afa-po tamin’ny famoahan’ny Minisiteran’ny Fampianarana ambony sy ny fikarohana ara-tsiansa ny tetiandro hamoahana ny vatsim-pianarana 3 volana sy ny fampitaovana manomboka ny 06 mey ho avy izao ireo mpianatra na ny tetsy Vontovorona na ny teny Ankatso, ka raikitra indray ny grevy mahery vaika omaly. Teny amin’ny Politeknika, nitohy ny fitokonana mahery vaika. Nalefa niditra an-tsehatra naaparitaka tamin’ny baomba mandatsa-dranomaso ny emmo-reg, ka nisy indray ny naratra. Potika ny fanondro sy ankihiben’ny tovolahy iray, tsy afaka manoratra kanefa fanadinana amin’ny herinandro. Tovovavy iray ihany koa no torana tamin’ny baomba mandatsa-dranomaso. 3 no naratra hatramin’ny nanombohan’ny grevy, saingy milaza ireo mpianatra fa vao mainka manetsika ny hambom-pon’izy ireo izany ka tsy mitsahatra ny tolona raha tsy mivoaka ny vatsim-pianarana 5 volana. « Tsy mahafa-po anay ilay telo volana, fa dimy volana ary miara-mandray daholo. Efa tany amin’ny taona 1900 io vatsim-pianarana io, ka farafaharatsiny avo roa heny. Raha tsy misy dingana mazava sy mari-pototra ataon’ny Fanjakana dia tsy hitsahatra ny grevy », hoy ireo mpianatra eny amin’ny Politeknika Vontovorona izay mitaky ny fanatsarana eny amin’ny « campus » ihany koa. Nifanindran-dàlana tamin’io, raikitra ary nangotraka ny grevy teny amin’ny Oniversiten’Antananarivo omaly alakamisy 02 mey 2024. Tapitra ny fe-potoana 72 ora nomen’ireo mpianatra avy amin’ny Siansa na FMSA hamahana ny olana samihafa eny amin’ny anjerimanontolo, toy ny fotodrafitrasa, olan’ny rano, fandoavana ireo vatsim-pianarana an’ireo « réclamations» ho an’ireo taom-pianarana roa teo aloha mbola tsy voaloa,… fa indrindra indrindra ny fampiakarana ny vatsim-pianarana. Milaza mantsy ireo mpianatra fa efa tsy mifanaraka intsony amin’ny vidim-piainana sy ny filàna ho an’ny lafiny fianarana. Nangotraka ihany koa ny grevy satria nidina teny amin’ny fiantsonan’ny taksibe 119 nanapaka làlana sy nandrehitra afo, ka minitra vitsy dia tonga ny Emmo-reg nandrava. Vao mainka nampiakatra ny maripana ka raikitra ny tora-bato, nirefodrefotra ny lakrimozenina. Nirantiranty ny sora-baventin’ny mpianatra manamafy ny fitakiana fampiakarana vatsim-pianarana, ary tamin’ny 4ora sy sasany hariva vao rava ny hetsika. Toa olana tsy mety milamina ity resaka vatsim-pianarana ity. Tena nahomby ve ny karatra e-poketra sa tsy tena voafehy ny ilay « digitalisation » mandrak’ity ny androany ? Marina fa misy ireo dingana ara-panjakana toy ny fanamarinana ny mpisitraka vatsim-pianarana, ny dingana amin’ny famoahana volam-panjakana,… saingy ny sary toa mitranga amin’ny ankampobeny dia rehefa misy grevy vao taitaitra, ka mila jerena manokana. Endrika maneho sy manamafy fa marary ny fampianarana eto Madagasikara ary betsaka ny zavatra mila hovaina sy hatsaraina.
Toky R


 

Dans la même rubrique

19-juil-2024

Nidina an-dalambe omaly ireo mpianatra mpikaroka mipetraka eny amin’ny Cité R+1 eny Ankatso.

Card image cap
19-juil-2024

Namoaka ny tetiandro momba ny taom-pianarana vaovao 2024-2025 ny Ministeran’ny

Card image cap
18-juil-2024

Nanao antsoavo ho an’ny filohan’ny repoblikan’i Madagasikara sy ny praiminisitra lehiben‘ny governemanta

Card image cap
18-juil-2024

Misy milaza ho mahita laza adina Bakalorea sahady ary mivarotra izany ao anaty

Card image cap