Fampianarana

Efa misy ny fangatahana fihaonana nataon’ny mpianatra mahakasika an’io, mbola manontany an-dry zareo, ary hisy fihaonana sy fifampiresahana aminy amin’ny ambangovagony, misy dingana maro ny ahatongavana amin’izay, ary misy antony betsaka ihany koa anefa ahafahana manao an’izay, hoy kosa ny Minisitry ny fampianarana ambony sy ny fikarohana ara-tsiansa omaly. Notsipihin’io minisitra io ihany koa anefa fa mpianatry ny ambaratonga ambony ireo ka mahafantatra tsara ny zava-misy, mahafantatra tsara ny lalàna mifehy ny tetibola sy ny famoahambolam-panjakana eto amin’ny tany sy ny firenena, mahalala ny voarakitra amin’ny fikirakirana volam-panjakana sy fahafahana manao izany sy ny mety ho tsy fahafahana manao izany. Tsara ny mampahatsiahy fa efa lany ny lalàna mifehy ny tetibolam-panjakana 2022, izay toa midika fa na mety hisy aza ny fahafahana mampiakatra ny vatsim-pianarana dia tsy ho amin’ity taona ity. Mikasika ny “vacation” kosa, nanamafy ny minisitra fa nisy ny fangatahana ny « vacation », namaly izany ny fitondrana, efa nalefa tany amin’ny Oniversite tsirairay ny 2021, ka voaloa ny rehetra ankoatra an’Antsiranana 80%, ary Antananarivo mbola tsy nisy. Tsy nisy fandefasana vola 80% avy amin’ny Fanjakana, fa rehefa nisy ny fanaraha-maso, dia ireo tsy nahatongavana “pièces justificatives” no nahintsana tao anatin’ny lisitry ny mpisitraka “vacation”. Izay taratasy voamarina sy voahintsy, izay ny oniversite ihany no afaka manao azy fa tsy ny minisitera, dia ireny ny vola nalefa tamin’ny oniversite tsirairay. Nanambara ny oniversiten’Antananarivo fa hivoaka amin’ity herinandro ity, ka miandry an’izany ny Minisitera. Tsy misy resaka “tranche” ny “vacation” fa manao fangatahana mandefa antontan-taratasy izy, dia manao fanamarinana ny Minisitera, ny Primatiora, ny Fiadidian’ny Repoblika. Nanomboka ny alatsinainy teo kosa ny fitsarana fanadinana ho an’ny sokajy ankampobeny, izay misy antanan-tohatra maromaro, tsy azon’ny Minisitera hitsabahana ny ankamaroany tahaka ny « déliberation ». Anelanelan’ny 13 hatramin’ny faran’ny aogositra no tombanana hivoahan’ny valin’ny fanadinana bakalorea ho an’Antananarivo.
Toky R