Kaominina alasora

Maro ny ezaka ataon’ny ben’ny tanana sy ireo mpiara miasa aminy ao amin’ny kaominina alasora ao. Isan’ny tena hanaovan’izany ny sehatry ny fampianarana. Hatry ny ela no efa tsy ampy ny sekolim-panjakana tao amin’ity kaominina ity, indrindra ny EPP na ny sekoly fanabeazana fototra. Fokontany 20 no mandrafitra ny kaominina kanefa dia mbola misy ireo fokontany tsy manana EPP akory. Ankoatra ireo fokontany ireo anefa dia maro ireo tanàna vaovao miorina ka tsy mitsaha-mitombo ny isan’ny mponina. Efa nisy ihany ny ezaka natao hoy ny ben’ny tanana Jimmy Randriantsoa tamin’ny fananganana EPP tamin’ireo fokontany izay tena mila izany saingy mbola tsy ampy. efa nahazo EPP vaovao ohatra ny tao amin’ny fokotany Amboaroy, Ambatomalaza, Ambodivoindava,…. Isan’ireo itadiavan’ny kaominina vahaolana amin’izao fotoana izao ny hananganana sekolim-panjakana manamorona ny By Pass satria tsy mitsahatra ny fitombon’ny mponina eny kanefa tsy misy ny sekoly handraisana ireo zana-bahaoaka. Toy izany ihany koa ny ao amin’ny fokontany Ankadindratombo, Est Mahazoarivo, Sud Ambohipo. Eo am-pitadiavana ny tany hanorenana sy ny mpiara-miombon’antoka hifanampy amin’ny fananganana izany izahay ankehitriny, hoy ny ben’ny tanana .
Solotiana