Nivadika taty Tsiroanomandidy avy eo ny taona 1992 ary nandrisika ahy ho kandida depiote tao an-toerana tamin’ny alalan’ny lisitra Mahaolona niaraka tamin’i Dama Mahaleo taty Antananarivo, hoy izy. Nandamina ny disadisa ara-politika teo amin’ny Federalista sy ny Herivelona izahay ny 1993 tao Brickaville. Namoaka ny ankamaroan’ireo mpandrindra filaminana na “agent de sécurité” tao amin’ny SPS ny 1994 ny GAKAMA. Nanomboka ny taona 1999 no nisy lalana nivoaka nilaza fa tokony manavao ny fisiana araka ny lalana 1997-014 ny fikambanana niforona talohan’ny taona 2000 dia voatery namorona sata manokana ho an’ny federasionin’ny haiady nentim-paharazana izahay. Noforonina koa ny federasionina iraisampirenena sy kaomisionina tekinikan’ireo kanto ary ny kolontsaina nentim-paharazana eto Madagasikara. Iarahana amin’ny minisiteran’ny fanabeazam-pirenena ireo ka tokony hampianarina any amin’ny EPP ny ringa, any amin’ny CEG ny Diamanga, any amin’ny lisea ny Morengy, any amin’ny oniversite ny Moridima mba ho tonga fiforonana asa sy zavatra atao ary fahasoavana ho an’ny firenena. Misy aretina ao amin’ny fampianarana ao. Lasa midofotra isika. Be olona nianatra eto Madagasikara fa tsy misy intsony ny tia karokaroka sy mahay mampiana-tena. Izay ilay anton’ny vahaolana entiko hoe andao hihevitra izay azo atao anatin’ny sekoly ianaranao, hoy hatrany ny tenany.
J. Mirija
