ANALAKELY-ZAZAVAVY VOAENDAKA

Hatramin’ny volon-doha lava aza lasa atahorana ny mitondra azy fa katsanan’ireo jiolahy eny am-pandehanana. Tovovavy kely iray vao 12 taona indray afak’omaly Alarobia 12 Jona no fantatra fa niharan’izany teny Analakely. Raha ny loharanom-baovao azo dia bandy telolahy no indray nanendaka azy io izay nitondra antsy sy hety. Avy hatrany dia ny volon’ity zaza ity ilay ilany lavabe mirandrana iny no nokantsanan’izy ireo tamin’izany. Mbola lasany ihany koa ny finday sy ny vola teny amin’ilay zaza. Raha ny fantatra dia nisy nahita tokoa izany tranga izany saingy nijery fotsiny izy ireo. Tsy mba nisy iray akory sahy nanohitra ireo jiolahy hoy hatrany ny vaovao ka nanavotra ity zaza ity. Marihina moa fa anisan’ny antony mampirongatra ny halatra volom-behivavy lava tahaka izao ny fisian’ireo mpanao volo mametaka soratra amin’ny varavarany fa mividy volo. Tokony hisy ihany ny fepetra raisina mikasika azy ireny fa tena mampidi-doza olona.
Pati
Legende : Tahaka izao sisa ny volon’ilay zazavavy kely !