ny sabotsy atoandro omalin'iny, hoy ny fampitam-baovao avy eo anivon’ny mpitandro filaminana omaly. Raha tsiahivina dia tonga nitaraina tao amin'ny Tobim-paritry ny zandarimaria Ambohimalaza ny tompon'ny fiara 4x4 iray miloko volom-batolalaka fa nisy nanafika teo amin'ny RN2 pk 11+800, tetezam-by fokontany Ambohitrombihavana, kaominina ambanivohitr’Ambohimangakely ka voambara fa nisy jiolahy efadahy nanambana basy azy teo amin'io toerana voalaza io ary nitarika azy niakatra ny lalana Imerikasinina. Nofatoran'ireo nangalatra fiara tamin'ny tady kiraro ny tanany ary najanon'izy ireo tao anaty kininina dia lasany ilay fiara. Etsy andaniny koa dia maro ireo fianakavian'ny tompon'ny fiara nanao fanairana an-tariby sy tamin'ny tambajotran-tserasera Facebook ka samy nampandre ny InfoCom Seg . Manoloana izany dia nandray andraikitra nanao fikarohana sy nifampita vaovao haingana ireo tobin'ny zandarimaria rehetra manodidina izay nahazo baiko fa tsy maintsy atao ny ahitana io fiara io ao anatin'ny fotoana fohy. Noho ny fifampitam-baovao haingana sy matihanina nisy teo amin'ireo zandary manara-maso ireo lalam-pirenena mivoaka an'Antananarivo, dia fantatra fa efa nandalo teny amin'ny lalan'Ambohidratrimo io fiara io, minitra vitsy taorian'ny naha very azy, araka ny angom-baovao. Niezaka nikaroka ireo zandary teny an-toerana ka sarona tao Antanjondroa ilay fiara tokony tamin'ny 6 hariva ny ampitso. Ireo jiolahy dia efa nandositra ary fantatr'izy ireo fa tsy ho lasa lavitra intsony izy ireo raha mbola mitondra ilay fiara. Araka ny loranom-baovao azo teny an-tsehatra dia efa fantatra ireo andian-jiolahy nahavanon-doza ka efa eo am-pikarohana azy fatratra ny zandarimaria tamin'ny ora nanoratanay. Ny Zandarimariam-pirenena dia manome toky fa tsy maintsy ho tratra ireo nahavanon-doza ary hampiharana lalàna velona, hoy hatrany ny fampitam-baovao.
J. Mirija
