Hita soa amantsara tao amin'ny tokantrano iray tao Ankilimarovahatse ilay zazamena vava nangalarina araka izany tamin’io afak’omaly alina io ihany, tokony ho tamin’ny 02 ora maraina. Vehivavy iray no hita niaraka tamin'ilay zaza ary rehefa nojeren'ny mpitsabo ny vatany dia fantatra fa tsy olona avy niteraka ity vehivavy ity. Nakana psikatra ihany koa ilay vehivavy sao marary saina saingy salama saina tsara ihany koa. Nosamborina avy hatrany ity farany . Feno hafaliana kosa ilay renin-jaza rehefa hitany sy naverina taminy ilay zanany.Notanana ihany koa ilay mpampivelona tao amin'ilay toeram-pitsaboana izay niray tsikombakomba tamin'ity vehivavy ity nahafahana namoaka ilay zaza tao amin'ny toeram-pitsaboana. Niaiky rahateo ny tompon’andraikitr’ilay kilika fa nisy ny tandreaka tao amin’izy ireo. Efa noraisin’ny Fitsarana moa ity raharaha ity. Raha araka ny tombatomban’ny maro moa dia mety tsy miteraka ity vehivavy iray tratra niaraka tamin’ilay zaza ka nitady hevitra mba hahazoany zaza ary izao nangalatra ny an’ny hafa izao. Tsiahivina fa nahandro sakafo nanoloana ilay klinika ny fianakavian’ilay zaza very ary tsy niala teo mihitsy raha tsy hita ilay zaza.
Nangonin’i Pati
