Fandriampahalemana

Tonga nitokana izany tany an-toerana ny Filoham-pirenena Andry Nirina Rajoelina. Nambarany nandritra ny lahateny nataony fa fotodrafitr'asa manakaiky vahoaka, ilain'ny vahoaka no atao ary mendrika ny vahoakan'Analanjirofo izany. Na izany aza anefa dia mitaky toe-tsaina mendrika sy fomba fiasa mifanaraka amin’ny filan’ny vahoaka ihany koa ny foto-drafitrasa natokana ho an’ny polisy tahaka itony. Misy amin’ireny polisy ireny mantsy dia mampitaraina vahoaka fotsiny. Vao tamin’ny herinandro teo ohatra dia polisy iray no nanosika mpitondra bisikileta teny Anosibe ka tapaka ny tanan’ity farany. Raha araka ny fantatra dia nandeha tamin’ilay lalana fandehanana mafy ilay bisikileta noho ny tsy fahalalany. Tezitra mafy noho izany ilay polisy ka nanaotao foana nefa saika niharan’ny fitsaram-bahoaka ihany koa. Ankoatra ny tranga tahaka ity farany dia maro amin’ireo polisy ihany koa no variana maka vola amin’ny fiara sy ny mpitondra moto fotsiny ka ilana fanovana. Ny toe-tsaina miova mantsy no mampandroso fa tsy trano tsara tarehy irery fotsiny ihany. Andrasana araka izany ny fiovan’ireo polisy mbola manao izany eto amintsika na aiza na aiza faritra misy azy. Ho an’ireo izay tratra kosa dia tokony handraisana fepetra hatrany.
Pati