TOVOLAHY VAO

Zava-doza no nitranga tany Andranomadio Foulpointe afak'omaly Sabotsy 29 Aogositra alina. Tovolahy iray vao 20 taona monja no nahavita namono nahafaty ny Reniny niteraka azy. Izy mianaka irery no tao an-tranony hoy ny loharanom-baovao. Noho ny antony tsy fantatra anefa dia nihetsika tampoka io tovolahy io ka ilay Reniny no nanamparany ny habibiany. Vao 46 taona monja io Reniny io. Ilay tovolahy raha araka ny fanazavan'ny fianakaviany dia mañana olana ara-tsaina. Afa-panadinana bakalorea soa aman-tsara anefa izy farany teo ary nahazo mention mihitsy hoy ny vaovao. Tany amin'ny zavatra hafa anefa no nanehoany izay fahaizana amam-pahalalana azony izay. Raha araka ny fanazavan'ny psikology iray dia vokatry ny tsy fahampian'ny fanabeazana ho olom-banona izay tokony averina ao anaty fandaharam-pianarana no manosika tanora maro hamono Ray aman-dReny tahaka izao. Toraka izany koa ny tsy fisian'ny fanajana intsony eny anivon'ny fiaraha-monina. Diso maka tahaka loatra ny any ivelany ireo tanora Malagasy ka tsy mampaninona azy ireo intsony ny mamono mahafaty ny namany na ny Ray aman-dReniny. Tsy misy hafa amin'izay ny zava-mitranga eny anivon'ny fiaraha-monina ankehitriny hoy hatrany izy.
Nangonin'i Pati
Légende : Betsaka ireo Reny maty vonoan-janany tahaka izao !