Fandriampahalemana

 Manodidina ny 58% n’ireo voafonja miisa 27 000 manerana an’i Madagasikara no efa voatsara ankehitriny raha ny nambaran’ny minisitry ny Fitsarana Atoa Imbiki Herilaza omaly. Ny taona 2008 no nahatratrarana io taha io farany teto Madagasikara, tamin’ny voafonja miisa 17 000. Nahitana fihatsarana ny vokatra na tsy mbola tratra aza ny fanamby napetraka 70/30 (70% voafonja efa voatsara, raha 30% sisa tokony hiandry fitsarana). Antony maro mo mahatonga izany, toy ny tsy fahampian’isan’ireo Mpitsara, ny fampitaovana sy ny hoenti-miasa. Ny antontan’isa farany dia nambara fa tsy maintsy hanaovana fampahafantarana mangarahara amin’ny vahoaka satria ny 31 Desambra 2021 vao tena tapitra tanteraka ny fotoam-piasana ho an’ny taona. Na eo tokoa mantsy ny fialan-tsasatry ny Fitsarana, dia misy foana ireo raharaha tsy maintsy mandeha, andraikitr’ireo miandry raharaha (tour de permanence). Ankoatra izay, fa maromaro ihany koa ireo fanapahan-kevitra noraisina nandritra ny fivoriana farany amin’ity 2021 ity, nataon’ny Filan-kevitra Ambonin’ny Mpitsara (CSM). Ohatra ny fandrosoana laharana, ny fanendrena amin’ny andraikitra vaovao ary ny famindrana toeram-piasana. Ho an’ireo raharaha hafa, toy ny momba ny Fonjan’i Miandrivazo, dia efa mandeha ny fanadihadiana ataon’ny Fampanoavana miaraka amin’ny Zandarimariam-pirenena, ho famerenana ireo voafonja tsy hita, ary ny mikasika ireo tompon’andraikitra nahatonga izany. Nivoitra ireo omaly 20 Desambra 2021 nandritra ny fitsidihana ny Akany Fitaizana zaza tsy ampy taona nania teny Anjanamasina.

Toky R