Eny amin’iny faritra Anosy sy Anosibe ary Anosizato iny no tena ahitana azy ireny. Manomboka amin’ny 500 Ar ny saran-dalana ka hatramin’ny 2000 Ar miankina amin’ny halaviran-dalana. Raha araka ny fanadihadiana natao dia efa nanomboka tamin’ny fotoanan’ny fihibohana ka tsy nampisy ny taxibe no nampahazo vahana azy ireny. Efa mahatratra eo amin’ny 60 isa eo izy ireo ankehitriny ka saika ireo tovolahy avy any ambanivohitra zatra manao bisikileta avokoa no manao ilay asa. Mangataka ny hidirany amin’ny sehatra ara-dalana izy ireo araka izany indrindra fa ny fahafahany miditra ao anatin’ny tananan’Antananarivo renivohitra. Mbola voafetra ihany mantsy ny faritra hahafahan’izy ireny miasa. Anisan’ny lafy ratsin’iny taxi-bisikileta ity moa ny loza mety hitranga tampoka eny an-dalana na dia hahafahana miady amin’ny fitohanana ihany koa aza izy. Olona mianaka ohatra no nazeran’ireny taxi-bisikileta ireny teny Anosibe andro vitsy lasa izay noho ny haratsian’ny sezany avy aoriana izay navadika ho seza hazo. Miezaka misisika toy ny moto ihany koa mantsy izy ireny amin’ny harivariva sy amin’ny maraina izay fotoana samy mahabe olona avokoa. Ny taxi lamosina sisa araka izany no andrasana dia feno tanteraka ny fitaterana olona eto amintsika ialana amin’ny fitohanana. Efa manomboka misy ihany koa mantsy amin’izao ny fibabena olona indrindra ho an’ireo lehilahy matanjaka rehefa tena tsy misy ny taxibe amin’ny harivariva iny.
Pati
Legende : Miha maro ireo taxi bisikileta
