kolontsaina

Nalaza indrindra tamin’ny andron’ny Romana : tany amin’ny roa arivo taona lasa tany, mba ho fanalàna hamohamo ny vahoaka, dia nikarakara lalao isan-karazany anaty kianja mifefy nantsoina hoe «Coliseum» ny Emperora. Isan’ireny ny ady nifanandrinan’ireo babo an’ady nofanina ho «gladiateurs». Rehefa lavo ny ankilany, dia mitodika any amin’ny Kaesara ny andaniny : raha mampiakatra ny ankibe izy dia velona ilay lavo ; raha mampitsingoloka kosa ny ankibe izy dia taperina ny ain’ilay lavo.

Ny fomba manao «like» amin’ny Facebook no tena mampalaza ankehitriny ny ankibe mitraka. Enti-milaza hafaliana, fisaorana, fankasitrahana. Mazava ho azy fa rehefa mifanohitra amin’ireo kosa (alahelo, hatezerana, fahadisoam-panantenana) dia sarin’ankibe mitsingoloka no aseho.

Asa moa, amin’ny andininy aiza amin’ny didy aman-dalàna eto Madagasikara no mamaritra io ankibe mitsingoloka io ho heloka. Fanehoan-kevitra somary maneso angamba tsy ompa, tsy ozona, tsy tevateva.

Ho an’ny mpitondra, tsy te hahazo ankibe mitsingoloka, tsotra rahateo ny atao : vahoaka tsy mosarena, afaka manantena rafi-pitsaboana manara-penitra marina, miandrandra fampianarana tsy mifamitaka ho an’ny zanany ary mahatoky ny mpitandro filaminana sy ny rafi-pitsarana. Ankoatra ireo, sarotra kosa aloha ny hahazo tehaka.

Tsetsatsetra tsy aritra reto ambany ireto, ho fanampim-pahalalana, dia ny halavan-drefy malagasy, mampiasa ny rantsan-tanana, araka ny fitanisa’ny «RAKIBOLANA» (Rajemisa-Raolison Régis) azy.

ANKY : halavan-drefy kely indrindra, mitovy amin’ny haben’ny ankibe iray, izay atao hoe iray anky na eranky na hoe voatondro iray.
ANTSEFAKA : halavan-drefy mitovy amin’ny elanelan’ny fanondro sy ny anky, izay hoe mitovy amin’ny voantondro efatra.
HAKIHO : halavan-drefy hatreo amin’ny loha-fanondroadala ka hatreo amin’ny kiho. Mitovy amin’ny roambinifolo zehy.
VOATONDRO : ny refy mitovy amin’ny haben’ny rantsana iray izay atao koa hoe anky.
ZEHY : halavan-drefy hatreo amin’ny ankibe ka hatramin’ny tendron’ny fanondroadala henjanina tsara. Ny halavan’ny zehy iray dia mitovy amin’ny voantondro valo na folo eo ho eo.

VANF