VELONA MANDRAKIZAY, ANTSA PASKA 2025

Amin’ny Alahadin’ny Paska 20 Aprily ho avy izao manomboka amin’ny 3ora sy sasany hariva no hanatontosana izany ao amin’ny FJKM Tranovato Ambatonakanga. Hanana endrika miavaka ny fampisehoana amin’ity taona ity satria hiarahany miasa amin’ny Fikambanana Mampiely Baiboly Malagasy (FMBM) noho ny faha 190 taonan’ny nahavitana printy voalohany ny Baiboly Malagasy. Hanana endrika roa ity hetsika ity. Ny voalohany dia ny fampirantiana momba ny tantaran’ny Baiboly Malagasy, izay nandalo vanim-potoana fito rehefa namoaka didy Radama I fa ny soratra latina no hanoratana ny teny malagasy tamin’ny taona 26 martsa 1823. Nandray anjara mavitrika tamin’ny fandikana ny Baiboly isika malagasy tamin’ny alalan’ireo nantsoina hoe : ny roa ambinifololahy. Ny Baiboly Malagasy dia vita printy tamin’ny 21 Jona 1835 ary zokiny indrindra amin’ny fiteny samihafa eran’i Afrika. Ny endrika faharoa dia ny amboaran-kira izay narafitra amin’ny ankapobeny tamin’ny sanganasan’ireo mpamoron-kira anivon’ny antokom-pihira Orimbato. Ahitana fizaram-potoana roa izany ka ny tapany voalohany dia handrenesana ireo hira momba ny fijaliana sy ny fahafatesana ary ny fitsanganan’ny Tompo tamin’ny maty. Ho re mandritra izany ny Kalvary (Fara Ratovo), Velona ny Tompo (Razafindramanga Minoniaina), Derao Izy (Emma Razafimamonjy) ... Ny tapany faharoa kosa izay atolotry ny mpanentana avy ao amin’ny FMBM, izay hifantohana amin’ny teny fanevan’ny faha 190 taonan’ny Baiboly malagasy manao hoe: MANDRE, MANDRAY ary MAMOA izay hoelanelanin’ny hira tsy mbola fandre toy ny : Fiderana ny Mpamorona (P.Andriantsalama) Teny soa (J. Rakotonirainy), Hanompo Anao (Tsiresy Rajaonarifetra), ...Hisy ny fahatsiarovana hozarain’ny Orimbato, amin’io fotoana io, izay marihina fa tsy misy vidim-pidirana.
Pati
Legende : Hafana tahaka izao ny fampisehoana hiarahana amin’ity antokom-pihira iray ity !