Politique

teren’ny eritreritro aho hanao fanairana ho an’ny vahoaka sy ho an’ny mpitondra, hoy ny Amiraly Didier Ratsiraka Filoha teo aloha teo amin’ny tambajotran-tseraserany omaly tokony ho tamin’ny 10 ora alina. Araky ny vaovao tonga aty amiko dia betsaka ny tobim-pahasalamana mitaraina fa tsy ampy ny fitoavana ao aminy (fitiliana, oxygene, masques, akanjo ...). Raha tsy maha diso re tompoko dia mba zaraiko aminareo ny hevitro : tsy fotoan’ny ady hevitra momban’ny « deuxième vague » na « nouvelle vague » intsony izao fa mitady hirongatra indray ity valan’aretina mampidi-doza ity isam-paritra, hoy izy. Aleo misoroka toy izay mitsabo, noho izany, ataoko fa tsy vitan’ny fananarana sy fanairana ny isambatan’olona intsony izy ity fa tokony hazava tsara ny fitsipika hifampifehezana. Amiko tokony averina ny fampiharana ny lalàna momba ny hamehana ara-pahasalamana. Na manao lalàna vaovao. Satria misy vaccuum juridique, misy banga ny lalana ihainantsika ankehitriny. Ahoana tokoa moa no hanasaziana ny olona tsy manao aro-vava sy orona eny an-dalambe, na ireo tsy manaja ny elanelana ray metatra ,na tsy mampiasa « gel hydraualcoolique » nefa tsy misy intsony lalàna mifehy an’izany? Hoy ny Amiraly. Ahoana no hanerena olona hanao aro-vava sy orona nefa ny vola hivelomany isan’andro ary tsy ampy ? Tokony zaraina maimaimpoana isan-tokatrano na isam-batan’olona mihitsy izy ireny ary tokony ampitomboina folo avo heny ny fitiliana manerana an’i Madagasikara, satria maro ireo Malagasy avy amin’ny toerana tsy nisy virus nefa miakatra an-tanan-dehibe nefa tsy manana “masque”. Farany fa tsy latsa-danja, araky ny efa nambarako teo aloha, tokony arovana ny fahasalaman’ireo mpitsabo isan-tsokajiny, ary omena “prime de risque” tambin-karama manokana amin’ny asa natrehany sy izay mbola atrehan’izy ireo noho ity valan’aretina ity. Ady iombonana izy ity fa tsy vitan’ny mpitondra irery fa isika vahoaka Malagasy mihitsy no mila mahatsiaro tena hiaro ny tenantsika sy ny ankohonantsika mba tsy hiverenana amin’ny fihibohana indray ary tsy ho faly ny hifanome tsiny lava izao. Miala tsiny, miala fondro, miala salohy fito raha misy manafintohina anareo izao teniko izao, hoy ity Filoha teo aloha ity. ‘

Toky R