Politique

Voizina hatrany ny tsy tokony hisian’ny fifanitsahan’ny Fanjakana na ny « Laïcité de l’Etat ». Adihevitra goavana teto ny resaka fianianana misy baiboly sy tsy misy dia ny an’i Marc Ravalomanana tamin’ny 2002 sy ny an’i Andry Rajoelina ny taona 2019. Raha raisina amin’ny fihetsiky ny mpanao politika maro an’isa, izay saika olon’ny fiangonana avokoa ankoatra ny maha olom-pirenena, dia lojika ny mety hananany anjara toerana na andraikitra any amin’ny fiangonana, ankoatra ny mety ho fitondrany anjara biriky samihafa. Ny mpifidy amin’ny fifidianana ihany koa saika manana ny fiangonany avy, ary olom-pirenena avokoa ireny. Mbola azo iadian-kevitra ny resaka « Laïcité de l’Etat » io, ary raha maka ohatra kely ohatra, dia fivavaham-panjakana Britanika ny fivavahana Anglikanina, ny firenena Arabo saika mametraka ny Korano ho fototra iorenan’ny Fanjakana,… Tsy atao mahagaga noho izany ny fidiran’ny mpanao politika an-tsehatra any am-piangonana amin’ny maha kristianina na any amin’ny finoana hafa. Ankehitriny, rehefa tena zohiana ny fihetsika miseho ankehitriny, tsikaritra ho miezaka maka ny fon’ny fiangonana ny Filoha ankehitriny. Mitombo ny fahitana azy amina lanonana ara-pivavahana, lasa malala-tànana kokoa. Taorian’ny fihetsiny tany Morondava roa herinandro teo izay, nitokana fiangonana tany Tanakompania Ihosy ny Filoha Rajoelina omaly. Naneho fa ny fampanantenana efa nataony tsy maintsy tanterahina hoy ny Filoha Andry Rajoelina. Tamin’ny 19 Mars 2017 no nanombohan’ny Kristiana tao amin’ny Fiangonana Loterana Malagasy (FLM) Tanakompania ny asa fanorenana ity trano fiangonana ity. Tafatsangana ny rindrina noho ny ezaky ny Kristianina tamin’izany. Nanomboka ny taona 2019 kosa no nanambara ny filohan’ny Repoblikan’i Madagasikara Andry Rajoelina raha nitsidika teto Ihosy, fa ho raisiny an-tanana manontolo ny fanamboarana ny trano fiangonana miaraka amin’ny fampitaovana ao anatiny, hoy ny fanazavana. Rehefa zohiana, tsy mifankaiza firy amin’ny fihetsika nanenjehana an’i Marc Ravalomanana ny miseho ankehitriny.
Toky R