Politique

Vatsian’ny vahoaka Amerikana vola amin’ny alalan’ny Sampandraharaha Amerikana miasahana ny Fampandrosoana Iraisam-pirenena (USAID), ary hotanterahin’ny PNUD io. “Maty ao anaty haizina ny demokrasia. Ary samy manana andraikitra amin'ny fitondrana hazavana ho an’ny governemanta isika. Ny tsy fahampian'ny mangarahara sy ny tamberin'andraikitra dia miteraka fatiantoka ara-bola sy fitohanan’ny fahafahana mihary," hoy ny tompon'andraikitra amerikana Amy Hyatt omaly nandritra ny fanombohana ofisialy ny tetikasa. Telo ny tanjona imasoan’ny tetikasa Rindra : Fanavaozana ara-pitsarana: hanavao ny rafi-pitsarana eto Madagasikara, ary hanokatra izany bebe kokoa amin’ireo olona marefo sy voahilikilika amin’ny fanatsarana ny fizarana torohay momba ny fitsarana, ny fanamorana ny fomba fiasa sy ny fandehan-draharaha, ary ny fampihenana ny fitohanan’ny raharaha amin’izao fotoana izao. Faharoa ny fanatsarana ny fahaiza-mitantana sy ny fitondrana tsara tantana: hiaraha-miasa amin’ny Kaominina 100 any amin’ny faritra dimy mba hampitomboana ny fidiram-bolan’izy ireo, hanamafisana ny fitantanana ny loharanon-karena eo an-toerana ary hanatsarana ny asa sahanin’ny kaominina. Hanome fiofanana mivantana eo amin’ny sehatry ny fitantanana, ny fitantanam-bola ary ny fampandrosoana ho an’ny mpiasan’ny Kaominina an-drenivohitra sy ambanivohitra. Fahatelo kosa ny Fanabeazana ny olom-pirenena sy fandraisana andraikitra: hametraka sehatra vaovao ny handraisana ny hevitry ny vahoaka sy hifampiresahana aminy, hampahafantarana azy ireo ny fanabeazana amin’ny maha-olom-pirenena sy ny hetsika ataon'ny vondrom-piarahamonina tarihan'ny tanora any amin'ny sekoly maherin’ny 200 any amin'ny distrika 20, ary hampiroborobo ny fandraisana andraikitra amin’ny maha olom-pirenena eo anivon'ny tanora malagasy. Hotanterahina any amin’ny kaominina 100 any amin’ny faritra Analanjirofo, SAVA, Atsinanana, Menabe ary ny kaominina Antananarivo Renivohitra sy ny manodidina ny tetikasa Rindra. Hiara-hiasa akaiky amin’ireo toeram-piofanana fototra eto Madagasikara.
Toky R