Politique

Tao anatin’ny fotoan-tsarotra no nanendrena azy rehefa voatonontonona tamina raharaha mangotraka ny nodimbiasany, dia Rtoa Rinah Rakotomanga. Ity farany izay nalefa tany an-dafy mihitsy aloha, nomena toerana tany amin’ny Masoivohon’i Madagasikara tany Frantsa. Efa nangatsiatsiaka ny raharaha vao niverina teto, ary mivezivezy matetika. Mampametra-panontana kosa ankehitriny hoe : inona no antony nanesorana an’i Soatiana Rajoelisoa ? Hadisoana tamin’ny asa ve? Tsy fahafaham-pon’ny Filoha ve? Na inona na inona antony, dia toa naman’ny natao sorona tao anaty Fanjakana. Mety nanolo-tena hitondra ny anjara biriky ho an’ny firenena tokoa, saingy mety simban’ny politika tao rehefa nitakosona tao anatin’izao fitondrana izao, kanefa tsy tody hatramin’ny farany. Endriky ny kitsapatsapa sy tsy fahamatorana ary tsy fahamarinan-toeran’ny Fanjakana ihany koa io. Hampisahanina andraikitra hafa toa ny Minisitry ny tontolo iainana teo aloha ve? “Mifarana androany ny andraikitra maha Talen’ny Serasera sy ny Fifandraisana amin’ny Daholobe ahy teto anivon’ny Fiadidiana ny Repoblika. Fisaorana lehibe no atolotro ny Filoham-pirenena Andry RAJOELINA tamin’ny fiarahanay niasa. Mankasitraka azy ny tenako tamin’ny nisafidianany ahy hisahana io andraikitra io nandritra izay fotoana izay…. Efa fanapahan-kevitro hatry ny ela ny hiasako ho an’i Madagasikara sy hanasoavako ny Mpiray Tanindrazana koa miroso manohy amin’izany ny diako raha sitrapon’Andriamanitra. Manohy manarina, manorina ary mandray andraikitra. Mankahery ny Filoham-pirenena sy ny Fitondram-panjakana am-perinasa amin’ny fanatanterahana ireo VELIRANO sy ireo asa maro fanarenana an’i Madagasikara…”, hoy i Soatiana Rajoelisoa omaly. Hanao izany ny tohiny?
Toky R