Politique

 Any amin’ny Filoham-pirenena ny baolina, fa raha ny nambarany ny talata teo, dia amin’ity volana janoary ity no hanolorana ny drafi-pampandrosoana PEM. Ny faramparan’ny desambra teo no nilazana fa nohalavaina ny fe-potoana ahafahan’izy ireo manolotra ny drafitra avy aminy avy. Tamin’io no efa nisy resaka nivoaka, fa misy tsy dia maharesy lahatra ny Filoha. Ho feno herintaona katroka ny 27 janoary izao ny governemanta amin’ny endriny ankehitriny, ankoatra ireo minisitra vitsy nampidirina sy nosoloina tao anatin’ny fihibohana. Ny fifanarahana “contrat-programme” no nambara tamin’izany fa mitohy, ary hitsarana ireo minisitra. Toa lasa miova ho ny fanolorana ny PEM izany aty aoriana. Ao anatin’izao toe-draharaha mafana izao, dia mety ho tafiditra ao anatin’ny kajy politika ny fanovana mpikamban’ny governemanta. Toa niperaka ho olana ho an’ny Fanjakana ihany koa ny tsy fahaiza-nandrindra ny teknika sy ny politika, izay tokony hiaraka foana ao anaty fitantanana ny firenena. Ireo ekipa nahatsiaro ho nametraka ny Fitondrana mahatsapa ho nailika, ary efa misy ny nimonimonina, kanefa ireo governemanta teknisianina tsy nahatafavoaka baolina tamin’ny ankampobeny. Asa iza no hisaorana ary iza no hotazonina, fa mamofompofona fanovana any an-dapa any?

Toky R