Politique

Rehefa tsy voahaja sy tsy mbola tanteraka ireo, dia mbola sarintsarina repoblika izany no misy. Asa aiza ho aiza izany i Madagasikara amin’ireo lafiny ireo? Fampiesonana aloha no betsaka. Tsy misy fitantanana madio sy mangaraharaha izany eto, fitsanjaram-pahefana sampontsapona tsy mifanaraka amin’ny lalàmpanorenana. Tao anatin’ity Fitondrana ity no nisiana ahiahina afera maloto momba ny fitantanam-bolam-panjakana betsaka indrindra tratry ny vaky bantsilana. Isan’ireny raharaha fitantanam-bolan’ny coronavirus nanaovana mpiasa nisahana ny tsenambaro-panjakana ampamoaka tao amin’ny Minisiteran’ny fahasalamana, saingy izy indray no nohenjehina sy nohelohina ary mbola horohoroana ara-pitsarana. Ireny niaraha-nandre ireny ny tatitry ny Fitsarana momba ny kaonty mikasika ny fandaniana ny 444 tapitrisa dolara na 1818 miliara Ar tamin’ny famatsiam-bola momba ny coronavirus, izay nirarakopana ny endrika tsy fangaraharana,… Ny resaka fitsinjaram-pahefana sarintsariny, ary mbola misy endrika fandikan-dalàna saingy terena hety sy tefena hifanaraha amin’ny mpitondra moa raha tsy hilaza afatsy ny resaka governora, izay tsy misy ao anaty lalàmpanorenana satria Lehiben’ny faritra fidiam-bahoaka no voafaritry ny andininy faha-154. Hireharehana ny tetibola 2 miliara Ar isaky ny governora izay tsy voafidim-bahoaka kanefa mikirakira sy manapaka amin’ny volam-panjakana, ny faritra samy manana ny velarany sy ny isan’ny distrika ao anatiny. Hitovy ve ohatra ny Faritra Bongolava tsy misy afatsy distrika roa sy ny any Atsimo Andrefana manana distrika miisa 9? Raha fitantanana mahomby na “bonne gouvernance” izany dia tsy ity Fitondrana Rajoelina ity mihitsy no fitaratra, antony mampahantra tanteraka ny firenena. Raha tokony ho henatra ny hoe: I Madagasikara no nataon’ny Firenena Mikambana ho fitaratra na “pilote” amin’ny politika ampiharina amin’ireo tany mahantra sy marefo indrindra, dia lasa rehareha izany ho an’ny mpitondra. Moa tsy vokatry ny tsy fahaiza-mitantana ve no mamparefo sy mampahantra fadiranovana ny firenena ?
Toky R