Politique

Nambarany, fa efa vita ny famotorana lalina na “Enquête au fond”, ary miditra amin’ny famintinana ny famotorana rehetra na “Interrogatoire récapitulatif” ny Fitsarana amin’izao fotoana izao. Rehefa vita iny dia hiroso amin’ny fitsarana, hoy izy. Nilaza io mpitsara ambony io, fa tsy ho ela, saingy mbola tsy voafaritra ny daty. Maro be rahateo ny olona nanaovana famotorana, raha ny fanazavana. Tsiahivina moa, fa olona 21 no tafiditra tao anatin’ny raharaha, ka 14 amin’ireo no natao andrimaso. Misy teratany Frantsay ny iray, ary Malagasy mizaka zom-pirenena Frantsay ny iray, miaramila sy zandary am-perin’asa 12 ihany koa no voasaringotra: 5 jeneraly, 2 kapiteny, ary 5 manamboninahitra lefitra. Misy zandary sy miaramila 4 efa misotro ronono ihany koa, ary sivily 5. Olona ambony 5 no voalaza fa nokendrena tao anatin’io ambara fa fikasana hamono mpitondra ambony antsoina hoe: “Apollo 21” io, ka tafiditra ao anatin’izany ny Filoham-pirenena Andry Rajoelina. Ny porofo ara-materialy eo am-pelantanana, dia ahafahana mamantatra ny tena atidoha an’io famonoana olona ambony sy fanonganam-panjakana io, araka ny efa nambaran’ny fampahalalam-baovaom-panjakana. Nahatrarana vola 900 tapitrisa, nogiazana niaraka tamin’ny fiara Patrol sy Nissan Harry body, basy fusil à pompe calibre 12 niaraka tamina bala miisa 6, solosaina sy finday, fitaovana informatika tamin’ny fisavana, ka anisan’ny hita ilay antontan-taratasy antsoina hoe: “Budget du projet Apollo 21” izay manazava ireo planina stratejika sy politika. Tao no nahitana fa olona 5 no nokendrena hovonoina, ahafaha-maka ny fahefana,… Tao ihany koa ny fisiana fifandraisana maro tamin’ny alalan’ny hafatra mifandraika amina olona ambony maro amina andrim-panjakana maro sy olon-tsotra. Nilaza ny Filoham-pirenena ny 8 aogositra fa misy mpanao politika ambony tafiditra ka dia miandry ny didim-pitsarana mety hamoaka an’io anarana io ihany koa ny rehetra hoe: iza ary ilay mpanao politika ambony ?
Toky R