Fikambanana misahana ny fifindra-monina Tonga eto ny Kandidan’ny Amerikanina

ho Tale Jeneralin’ny Sampandraharahan’ny Firenena Mikambana Misahana ny Fifindra-monina (OIM) Amy Pope. Sambany teo amin’ny tantara no nisy mpifindra monina maherin’ny 100 000 000 maneran-tany, satria atosiky ny ady sy ny loza voajanahary ary ny fahantrana lalina hiala amin’ny toeram-ponenany ny olona ary vokatr’izany dia very ny maha-izy azy ireo ary simba ny fihariany sy ny fanabeazany, hoy ny Amerikanina. Vokany, tonga eo amin’ny kihon-dalana iray amin’ny fijerena ny momba ny mpifindra-monina maneran-tany isika izao. Tonga teto Madagasikara tamin’ity herinandro ity noho izany I Michele J. Sison sy sy Amy Pope hamantatra misimisy kokoa momba ny olan’ny fifindra-monina izay atrehan’ny firenena Malagasy sy hampahafantatra ny vina entin-dRtoa Pope momba ny ho avin’ny OIM. Nihaona tamin’ny Minisitry ny Raharaham-bahiny Yvette Sylla sy ny Minisitry ny Atitany Justin Tokely Rtoa Sison sy Pope, ka niresaka ny fomba entin’ireo firenena mpikambana ao amin’ny OIM toa an’i Madagasikara miatrika ireo fanamby ankehitriny sy amin’ny ho avy ary misitraka ireo tombotsoa mety hoentin’ny fifindramonina azo antoka, mirindra sy manaja ny maha-olona. “Mankasitraka ny governemanta Malagasy aho noho ny fanasany ahy ho tonga eto hifampidinika amin’izay fomba tsaratsara kokoa hoentin’ny OIM mamaly ny filan’ireo olona marefo indrindra sy ny fomba ahafahana mitady vahaolana miaraka hiatrehana ny olana momba ny toetrandro”, hoy Rtoa Pope. Ny Sekreteram-panjakana Lefitra Sison kosa naneho, fa “ny fifandraisan’ny governemanta Amerikana sy Malagasy dia zava-dehibe amin’ny fampiroboroboana ireo tombotsoa iombonan’ny roa tonta, ny fampandrosoana ara-toekarena, ny ady amin’ny tsy fanjariana sy ny tsy fahampian-tsakafo, ny fifindra-monina,…”. Ny 15 Mey ho avy izao no hananterahana amin’ny fomba ofisialy ny latsa-bato hifidianana izay ho Tale Jeneralin’ny OIM.

Toky R