Sosialy

Miditra amin’ny fanenjanana sy jadona fa tsy misy fifandresen-dahatra intsony. Marina fa soa ho an’ny sarambabem-bahoaka ary tsy hoe: miaro ny taksibe na maniry ny hiakaran’ny saran-dàlana raha mametra-panontaniana hoe: izay tokoa ve no ara-drariny sy hisiny raha ampitahaina amin’ny fiakaran’ny vidin-tsolika 1500 sy 1800Ar isaky ny solika? Asa ho an’ny vahoaka io, saingy asa fandraharahana misy fampiasam-bola sy mitady tombony ihany koa. Sao mba tahotry ny hisian’ny fipoahana ara-tsosialy sy ny fahatezeram-bahoaka dia ny mpitatitra no foretina kanefa ny solika midangana izay tsy izy tsy hita izay hanaovana azy? Raha afaka manao izany ihany ny Fanjakana, sao mba tokony hampiharina amin’ny vidim-piainana ankampobeny izany? Ny endriky ny serasera atao amin’izao fotoana izao dia tahaka ny hoe: nampidinina ho 4500Ar sy 5900Ar ny vidin-tsolika raha tokony ho 6000Ar mahery, ny saran-dalàna 800Ar dia nampidinina ho 600Ar ho fitsinjovana ny vahoaka. Somary hoentin’ny sangisangy zary tenany ity resaka ity hoe: raha afaka mandrahona sy manery tahaka izany ihany ny Fanjakana hoe: 100Ar ny fiakaran’ny saran-dalàna azo ekena, nahoana no tsy mba atao tahaka izany aza ny solika hoe: manomboka izao dia hosaziana izay manao vidin-tsolika 4900Ar sy 5900Ar fa manomboka amin’ny zoma tahaka ny taksibe dia fiakarana 100Ar na 200Ar isaky ny litatra no azo ekena? Tahaka izany ihany koa ny fifehezana ny vidim-piainana amin’ny ankapobeny, ny vidin’ny entana ilaina andavanandro (PPN),… Ny zavatra misy eto raha jerena amin’ny fepetra teo aloha, ferana ny vidin’entana tokony ho farany ambony, ary iny no mivadika ho farany ambany avy eo. Tsy ny resaka taksibe ihany ny fiainam-bahoaka, fa manao ahoana ny zotra nasionaly, ny fitaterana any amin’ny faritra hafa,… Sa Antananarivo irery no Madagasikara? Satria ratsy ho an’ny Fanjakana raha Antananarivo no mitroatra dia ezahina alamina sao hipoaka eo ihany ny sarom-bilany ?

Toky R