Mikasa ny hamerina ilay vodilaharana malagasy eo amin’ny taranja baolina kitra, Andy Pelmard, ao aminy indray ny klioba divizionina voalohany frantsay, OGC Nice. Vonona ny hividy ny lehilahy amin’ny sandany 500.000 Euro ity klioba efa nisy azy ny taona 2019 hatramin’ny 2021 ity, raha ny fampitàm-baovao voaray. Mila mivarotra mpilalao ny klioba mialohan’izany fifanarahana izany. Isan’ny nahafantatra ny fifindràn’ity mpilalao avy nindramin’ny klioba polonais, Jagiellonia Białystok, ity koa ny kliobany ankehitriny, Clermont Foot 63 na CF63, izay ao Frantsa ihany. Ny klioba belza, Royal Antwerp FC, moa no efa nanome sandam-bidy 200.000 Euro saingy nolavin’ny CF63. Nilaza ity klioba ity fa tsy ho alefany amin’ny vidiny latsaky ny 500.000 Euro ity vodilaharana malagasy 26 taona, mirefy 1,80 metatra ity, raha ny fampitàm-baovao voaray hatrany.
Nangonin’i J. Mirija
.jpg)
.jpg)
.jpg)