Sport

Araka ny fanazavan-drizareo mpikarakara izany tetsy amin’ny Dyve garden Anosivavaka omaly dia hetsika iray lehibe eo ambany fiahian’ny federasionin’ny kodiaran-droa na «motocyclisme» izy ity. Ho avondrona amin’io fotoana io avokoa ireo mpisehatra anatin’ny resaka moto rehetra. Voakasika voalohany amin’izany ireo mpivarotra moto na «concessionnaire», hoy izy ireo. Hampiranty ny moto amidiny ireo. Eo koa ireo orinasa mikirakira sy mivarotra fitaovana mifandraika amin’izany. Handray anjara koa ireo klioba mpankafy izay kodiaran-droa izay. Hisy ny sehatra hifankahafantaran’ireo klioba maro samihafa. Hisy toerana manokana koa hanatontosana fanamby na «challenge» hanaovana fampisehoana mikasika izay fankafizana sy maha fanatanjahantena ihany koa izay resaka moto izay. Tsy ny mpankafy kodiaran-droa ihany fa na ny fianakaviana sy liana amin’ny izany dia asaina avokoa. Efa misy ihany koa ny fiahiana amin’ny resaka ara-pahasalamana ho an’ireo izay sanatria maratra na handalovan’izay tsy fahasalamana izay eny an-toerana ary isan’ny mampiavaka azy ity ny fitontonany miaraka amin’ny fifaninanana «Grand prix d’Italie» any Eoropa ka noho izany dia hisy fanarahana mivantana an’izay koa eny an-toerana. Manodidina ny 60 isa eo ireo tranoheva handray anjara ary tsy ho ferana kosa ny isan’ireo hitsidika, hoy hatrany ny fanazavana. Nomarihina moa fa ireo moto voasokajy anatin’ny antsoina hoe kodiaran-droa sy ny tontolon’izay ihany no hasongadina eny an-toerana amin’ity aloha.
J. Mirija