Nicolas Dupuis Mbola miezaka miaro tena hatrany

Mendrika iny fandreseny iny ny mpifanandrina na dia tena tsara aza ny endri-dalao nasehontsika nandritry ny 35 minitra voalohany, hoy izy. Baolina tokana ihany no tsy tafidiny. Azoko in’arivo ny fahadisoam-panantenan’ireo mpanohana. Hanome ny rehetra izahay mba hahazoana fandresena amin’ity lalao miverina ity. Malahelo aho fa tsy afaka nanaradia taty ny 3 tamin’ireo mpilalao isany ilaina. Ny tsy maha eo an’I Datsiry sy Loïc ary Sylvio dia ho fahavoazana ho antsika. Ny iray moa noho ny antony ara-pahasalamana ary ny an’ny roa hafa kosa dia noho ny fitondran-tena tsy mendrika izay tsy ankasitrahako mihitsy. Nanaraka anay kosa I Ando sy Tendry ary nameno vondrona tena vonona, hoy hatrany I Nicolas Dupuis. Hita ho mbola miezaka miaro tena sy te hanipy ny mbola mety tsy ho fahombiazany amin’ny hafa hatrany araka izany ity mpanazatra ity. Efa manana ny tsy fahafahan’ireo mpilalao miisa 3 voalazany teo ho mety ho anton’izany tsy fahombiazany izany na “excuse” indray, araka izany, ny tenany amin’ity lalao atrehina anio ity. Ny mahagaga dia mbola sahiny ihany ny milaza fa mbola tena anaty fahavononana ny ekipam-pirenena na teo aza ireny faharesena tetsy Mahamasina farany teo ireny? Mirary fandresena ho an’ireo boay kely hatrany tokoa moa na izany aza ary dia ho hita eo indray izay ho ambaran’ingahy Nicolas Dupuis aorian’ity lalao anio ity.
J. Mirija