Mihatra manomboka anio ny haba 15% alain’ny amerikanina

amin’ny entana avy eto Madagasikara mankany Etazonia. Ity fanapahan-kevitry ny filoham-pirenena amerikanina, Donald Trump, noraisiny ny fiandohan’ny volana aogositra ity, raha tsiahivina, dia fanintsiana ny fanapahan-kevitra noraisiny ny volana aprily, izay saika nakàna haba midangana 47%. Isan’ny famakafakàna nivoy nanoloana izany moa ny hoe eto Madagasikara izany, ny TVA na «Taxe sur les valeurs ajouté», izany hoe hetra alaina amin'ny zana-bola indramina any amin'ny banky dia mahatratra 20%, araka ny napetraky ny fitondrana Rajoelina. Na dia voalaza aza fa tsy voakasik’izany ireo olon-tsotra sy mpampanjana-bola madinika na «microfinance» dia mongo ao anatin’izay kosa izany ireo mpandraharaha izay sehatra tokony ho mpamoron’asa na mpanome asa ho an’ny vahoaka. Tsy nihena izany na dia nikaikaika aza ireo mpandraharaha madinika. Ny an'ny filoha amerikanina nefa haba 47% no nokasainy halaina amin’ireo entana avy eto Madagasikara, tsy nampihariny avy hatrany izany ary taorian’ireo fangatahana sy fitarainana samihafa dia nahenany ho 15% mihitsy aza. Ny filoham-pirenena amerikanina indray, noho izany, rehefa aravina ny zava-misy, no hita ho mitsinjo kokoa ny vahoaka malagasy noho ilay fitondràna mijoro eto amin’ny firenena. Tsy vitan’ny hoe mihatra manomboka anio ilay haba 15% tataovana amin'ny entana malagasy miditra any Etazonia fa mbola 0% koa no alainy amin’ny vokatra Lavanila, raha tsiahivina hatrany.
J. Mirija