Toekarena

Raha ny janoary 2019 taona voalohany nandraisan-dRajoelina ny fahefana anefa, niainga teo amin’ny 3900Ar ny sandan’ny Euro iray, ary tsy niala lavitra ny 4000Ar nandritra ny 2019. Ankehitriny anefa, efa mitady ny hanafosafo ny 5000Ar raha izao fandehany izao. Rehefa miakatra ny sandan’ny Euro manoloana ny Ariary dia midika izany fa miha mitotongana hatrany ny vola Malagasy. Antony ny tsy fisian’ny fifandanjan’ny vola vahiny miditra sy mivoaka izay matetika miankina amin’ny fanondranana sy fampidirana entana na “balance commerciale”. Manatombo be ny fanafarantsika entana any ivelany kanefa ny vola miditra amin’ny fanondranana tsy misy. Mamoaka vola vahiny betsaka izany isika. Vao mainka miha sahirana satria mbola vidiana avy any ivelany ny ankamaroan’ny filàna: solika, fanafody, entana ilaina andavanandro,… eny fa hatramin’ny vary izay tokony ho azo vokarina eto aza. Rehefa lafo ny hividianana ny vola vahiny hanafarana entana, miakatra ho azy ny masonkarena, miakatra ny vidin’entana, mbola ampian’ny làlan-dratsy tsy voakojakoja dia mitombo ny fandaniana izay tsy maintsy any amin’ny vidin’entana no hanentsenana azy. Tsy tena misy politika mazava hiatrehana ny zava-misy, fa zary fialana bala sy fitanisana ny olana any ivelany lazaina fa miantraika aty amintsika hatrany, toy ny coronavirus sy ny ady any Ukraine. Tsy misy zavatra tena mandeha intsony eto, fa tena anatin’ny fikatsoana tanteraka ny firenena, ka isan’ny fositra voalohany ny tsy fahaiza-mitantana. Samy nandalo krizy sy fahasahiranana fa mbola tsy nisy sandam-bola nitotongana tahaka io. Efa nisy foana ny kere fa tsy mbola nisy olona nivaro-janaka izany tao anatin’ny 60 taona satria aleony velona eny an-tanan’olona toy izay maty eo an-tànany raha tsy tamin’ity Fanjakana ity. Efa nisy foana ny fiakaran’ny vidin-tsolika iraisam-pirenena, fa tsy mbola nisy fiakarany 1800Ar isaky ny litatra izany hatramin’ny naha Madagasikara antsika. Tsy mbola nisy làlam-pirenena potika sy rotidrotika noho ny tsy fisian’ny fikojakojana tahaka izao izany ihany koa hatramin’ny nahapotsiran’ny voamaso angamba. Ny vidim-piainana moa io iaraha-mahita io! Tsy vitan’ny fizatana vary 5 na 10 na 25kg amin’ny olom-bitsy arahina serasera manaka-danitra dia hanantena figalabonana 5 taona manaraka hitarika fahapotehana firenena fa efa manomboka tonga saina ny olona hoe: tsy izy intsony ity, tsy misy zavatra voafehy, ny afera sy kolikoly no mahazo laka, ny vahoaka miha fadiranovana.
Toky R