Edito

Io ilay tonga amin’ny fitenin’ny Ntaolo hoe tsy afenina fa arangaranga. Iza moa izany izao sisa no tsy nilaza fa manitsoka dosie ny praiminisitra lehibe ny governemanta. Mahay manasonia izany ihany anefa rehefa misy grevy kay, hoy ry zareo teo anivon’ny SECES izay. Vao omaly koa iny ny filohan’ny vaomiera misahana ny resaka tany eo anivon’ny antenimieram-pirenena no nanamafy ny fisian’izany tamin’ny alalan’ny hita ho sarim-pangatahana ihany, mba tsy hilazana hoe toa moduy fangatahana ny praiminisitra mba hijery ny momba ireo taratasy mikasika ny ady tany eto Madagasikara. Hatramin’ireo mpandinika sy mpamakafaka, maro no efa hita ho niaiky fa raha nisy ny praiminisitra tsy nahitana fahombiazana indrindra hatramin’izay nisy teto Madagasikara dia ity praiminisitra ankehitriny ity nefa dia mahagaga fa izy no naharitra indrindra tamin’ireo rehetra efa nandalo. Na eo aza anefa izany tsikera rehetra izany dia sarotra koa ny tsy hilaza fa efa naman’ny rano raraka ho an’izao fitondrana izao ny mbola fitazomana azy amin’ny toerany mandrak’ankehitriny na dia efa nisy aza ny fitsipaham-pitokisana nataon’ny maro an’isa tamin’ireo depiote. Mampametra-panontaniana toa adaladala ihany indraindray ny fisian’ny toe-javatra toy izany hoe ahagaga ve raha tsy mahalala intsony ny tena tokony ho andraikiny koa ilay filoham-pirenena fa ilaozany mizarazara vary masaka sy mamantsipantsika dabilio sisa? Hahagaga ve raha mbola fizarazarana jiro “cobra” eny amin’ny tontolo ambanivohitra hatramin’izao no mba hany misongadina rehefa miresaka angovo eto amin’ity firenena ity? Ny an’olona anefa efa resaka hoe mandeha amin’ny herinaratra ny azy fiarakodia. Ny an’ny sasany efa mampidera hoe misy tanana tsy miantehitra amina herinaratra intsony ao aminy fa efa masoandro daholo ny azy no loharanon’angovo. Dia toy izany sy toy izany hatrany sisa ilay fiainam-pirenena eto amin’ity tanindrazana malalantsika ity.
J. Mirija