Tsy vitan’ny revin-gadra ny ady

mitaky finiavana, mila fahaiza-mitantana, mila fahaiza-miombona, mila fanabeazana,… Tsy vitan’ny eritreritra na hevitra manidintsidina na nofinofy fa tena mitaky fahaiza-mijery sy mandalina izay tena mahasoa ny vahoaka sy ny firenena, ary mila paikady mahomby sy tsara rafitra hoenti-manatanteraka izany. Mora ohatra no miteny hoe : « calme fa tsy hataoko mahantra intsony ianareo » araka ny filazan’ilay mpitondra farantampony iray fa moa manana fanantenana ny amin’izany ve ny Malagasy ? Moa vitan’ny kabary politika mampandrevorevo tahaka izany ve ny ady amin’ny fahantrana sy fampandrosoana firenena ? Matoa ny olona mandroso, matoa ny olona mivoatra,… dia isan’ny zava-dehibe indrindra ny fitiavan-tanindrazana, ny fanomezana tombondahiny ny vahoaka, ny fahaiza-mandalanjalanja izay mahasoa ny maro an’isa,… Indrisy anefa fa mampanongo tena ny maheno sy mahita mpandraharaha Malagasy vaky vava miteny hoe : « izaho aho vao tonga saina hoe nahoana ny manam-pahaizana Malagasy no tsy te hijanona sy hiasa any ivelany, satria na eto an-tanindrazany aza mahatsiaro ho tsy misy mpiahy ». Moa tsy efa betsaka ny endrika maneho eto fa lasa tompony mangataka atiny ny Malagasy eto an-tanindrazany ? Moa tsy ny mpitondra Fanjakana no mihazakazaka mivarotra tanindrazana amin’ny vahiny toy ny ahiahy goavana any Antsiranana sy Nosy Be ankehitriny manoloana ny resaka miely henon’ny vahoaka fa handefasana miaramila hanongotra amin’ny taniny ? Inona intsony moa no mba tena fiahiana ny Malagasy eto ? Ny kitositosika isaky ny akaiky propagandy ve ? Ny fananany robain’ny dahalo, ny taniny robain’ny mpanam-bola, ny rano sy jiro tsizarizary, ny asa tsy misy, ny vidim-piainana midangana,… Dia izao ve no antsoina hoe : Madagasikara tsy maintsy mandroso sy tsy hatao mahantra intsony ny Malagasy ? Efa ela izay resaka manidintsidina nafafy izay ka anjaran’ny rehetra no tonga saina hoe : mbola hino sy hanantena an’izany sa handray andraikitra hanatsimbadika ny pejy amin’izay ?
Toky R