TENY GASY Fanabeazana sy Fampianarana tsara orina no fototry ny Firenena

Vatsim-pianarana sy Fitsinjaram-pahefana : raha ny taona 1950 ohatra, no nosantarina teto Antananarivo-Renivohitra ny Fampianarana ahazoana «Licence en Droit», efa ho telopolo taona aty aoriana, 1977, vao nisy «CUR» (Centres Universitaires Régionaux) isaky ny Renivohi-paritany dimy hafa. Nakarina sata ho Oniversite ireny tamin’ny 1988, saingy aty amin’ny taona 2001-2002 dia mbola hoe 65% ny mpampianatra amin’ny Ambaratonga Ambony dia teto an-dRenivohitra. Oniversite anarany fotsiny angamba ireo notokanana isaky ny Faritany hany ka ny mpianatra 14.244 tamin’ny 20.000 nanerana an’i Madagasikara (2001-2002) dia namonjy an’Antananarivo avokoa. Raha nahafeno ny fepetra maha Oniversite azy ny isaky ny Renivohi-paritany (taranja maro, mpampianatra ampy fahaizana ary ampy isa, «bibliothèque» misy boky an’alina, «laboratoires» ary fomba, ets.) afaka nijanona tany aminy ny mpianatra maro, ka tsy nila nangataka vatsim-pianarana ho fonenana sy sakafo am-pivahiniana.

Inona no antony tsy nanatanterahana izany fepetra kely indrindra hahalavorary ny Fampianarana isam-paritany, isam-pivondronana, isam-piraisana, isam-pokontany izany ? Finiavana politika izay, raha ny tena marina, dia Fitiavan-Tanindrazana tokoa.

Mpitondra mikasa hamerin-kasina ny firenena izany, tsy maintsy ny Fampianarana sy ny Fanabeazana no atao tsara orina ho fototra mateza, satria ny olona no voalohan-karen’ny firenena iray.

Naman’ny Mpamadika Tanindrazana, raha izany, izay manao ny Fampianarana ho ambin-javatra ary manamavo ny asa Fampianarana amin’ny tsy fanomezan-kasina ny Mpanabe sy ny Mpampianatra, izay mikolo ary mitaiza ireo solofo sy dimby. Fambolena sy Fiompiana ho sakafo fivelomana, Fitsaboana hitsinjo fahasalamam-bahoaka, Fitsarana anankinana ny rariny sy ny hitsiny, Fitandroana Filaminana mba ho fiaraha-monina tsy an-driran’antsy, Fampianarana mba tsy ho adala toa an-drainy (sy reniny), dia Fanjakana manomba ny fahalalan’ny tsirairay anatin’ny tombontsoan’ny daholobe.

Fanabeazana sy Fampianarana no mandatsaka am-po sy mandentika an-tsaina ny fifampitsinjovana farafahakeliny hahafahana miaraka monina tsy mifandratra. Fanabeazana sy Fampianarana no mandatsaka am-po sy mandentika an-tsaina ny fitsipika tsy azo tsiniavina raha hiaraka miaina tsy mifanafintohina. Fanabeazana sy Fampianarana no mandatsaka am-po sy mandentika an-tsaina ny tantara niombonana sy ny vina mbola hiarahana maha-Firenena.

VANF