Fahatapahan’ny rano am-bolana maro Nangotraka indray ny grevin’ny mpianatr’Ankatso

Samy misedra an’io na ny enyy Ankatso I na Ankatso II. Efa 5 volana no voalaza fa tsy nisy famatsian-drano, ary milaza ireo mpianatra fa telo volana tsy nahitam-bokany ny fangatahana rano. Voatery mividy rano 800 hatramin’ny 1500Ar isaky ny bidon 20L. Raikitra noho izany ny fitokonana ka nanakan-dàlana sy nandoro kodiarana ireo mpianatra. Tranga tsy vao androany, fa efa mateti-pitranga eny Ankatso. Vahaolana aroson’ny tompon’andraikitra raha ny hita hatrizay moa ny fampiasana ny “citerne”. “Ahoana ny ahafahan’ny “citerne” manatitra rano any amin’ny “bloc” tsirairay, izay misy olona 25 isanisany? Ny ranonay mandeha no tadiavinay. Mangataka ny hanomezana famatsiana na “source” vaovao”, hoy ireo mpianatra. Na teo aza izany, “citerne” no vahaolana vonjimaika naroson'ny Ministeran'ny Rano sy ny JIRAMA ary ny CROUA ho an'ny mpianatra taorian'ny fitokonana nataon'izy ireo. Eo ihany koa ny fifandimbiasan'ny famatsiana rano ho an'ny faritra ambany amin'ny faritra ambony. Nivoitra tamin’ny fihaonana fikaroham-bahaolana omaly ihany koa fa hampitomboina sy havaozina ny famatsian-drano amin'ireo tranon’ny mpianatra voakasik'ity olana ity. Ny 𝐂𝐑𝐎𝐔𝐀 no hanao ny fangatahana mandritra izany. Nojerena koa ireo fantsona tranainy sy ireo fantsona tsy ara-dalàna teny amin'ny tranon'ny mpianatra Ankatso II. Raha araka ny fanazavan’ny teknisian'ny JIRAMA mantsy dia izany no tena olana fototra tsy hahazon’ireo mpianatra ireo rano ankoatra ny fahanteran’ny foto-drafitrasa. Manantena araka izany ireo mpianatra fa hivaha tsy ho ela ny olana. Mialoha izany anefa dia tsy nanaiky ireo mpianatra fa tsy maintsy novatsiana rano tamin’ny alalan’ireo fiarabe mandehandeha omaly. Hitokona foana moa ireo mpianatra ireo raha tsy miverina ara-dalana ny ranon’izy ireo.

Pati sy Toky R