Fifidianana Filohan’ny CAF anio

Tsy misy mpifaninana fa dia hanohy am-pitoniana ny asany amin’ny maha filohan’ny CAF azy ity mpitantana am-perin’asa izay hofidiana androany 12 martsa ity. Tsy hisy endrika fifidianana akory madritra ity andro fahatelo amin’ny fivoriambe tsy ara-potoan’ny CAF ity fa tonga dia hotsenain’ireo mpikambana amin’ny alalan’ny tehaka mirefodrefotra izy amin’ny maha kandida tokana azy. Teratany afrikana tatsimo izy, ary mpanefoefo ao amin’ity firenena ity, tombanana ho 2,7 miliara dolara ny fananany. Izy no tompon’ny klioba Mamelody Sundowns. Zaodahin'ny filoha Afrikana tatsimo Cyrille Ramaphosa ihany koa moa ity farany. Ankoatra izay, isan’ny hofidiana androany ihany koa ny eo anivon’ny komity mpanatanteraky ny CAF ka isan'ny kandida amin’izany i Samuel Eto'o izay efa filohan’ny federation’ny Baolina kitra ao Cameroun. Notsipahin'ny CAF anefa ny filatsahan-kofidiany noho izy nambara fa tafiditra tamin'ny raharaha maloto tamin'ny lalao nataon'ny ekipam-pirenen'i Cameroun. Nivoaka anefa ny didin'ny TAS « Tribunal Arbitral du Sport » nanadio azy. Dia izao izy azo fidiana androany izao indray, ary mety ho lasa filoha lefitry ny CAF mihitsy. Efa nanomboka ny 10 martsa teo moa no nihaona tao Le Caire ireo mpitantana baolina kitra Afrikana. Nandritra izany no nanaovana ny fihaonana teo amin’ireo fikamanam-paritra ao anatin’ny CAF ary narahana lalao ara-pirahalahiana teo amin’ireo mpikambana ao anatin’ny biraon’ny CAF sy ireo mpilalao kalaza tranainy Afrikana. Omaly 11 martsa kosa no nanatanterahana ny fivorian’ny COMEX na ny komity mpanatanteraka eo anatin’ny CAF izay nandinihana ny ho avin’ny Baolina kitra Afrikana.
Solotiana