Kung-Fu Wisa « Handray anjara amin’ny raharaham-pirenena… »

Lanonan-dehibe ho an'ny federasionin’ny Kung-Fu Wisa sy ny Ligin'Analamanga no natao ka nisy ny fampisehoana teknika na “démonstration’’ nataon'ireo mpikatroka avy ao Analamanga, nisy ihany koa ny fampianarana teknika sy fampianarana "Développement Personnel" nataon'i Grand Maître Avoko izay sady filohan'ny federasionina. Fotoana koa io nanararaotan'ny mpikambana kung-fu Wisa tao Analamanga nifampiarahabana noho ny taona vaovao ho an'ny mpitantana sy ny ray aman-dreny Kung-Fu Wisa ka nisy ny fizarana vatomamy ho an'ny mpanatrika rehetra. Nisy ny jery todika ho an'ny taona lasa izay nahavitan'ny federasionina ny fitetezam-paritra manerana ny nosy ary koa fizarana "Sonorisation Mobile" ho an'ny ligim-paritra tsirairay avy. Ny alahady teo kosa no nanoloran'i Grand Maître Avoko ny solosaina ho an'ny ligin'Analamanga mba hanatsarana ny fomba fiasan'izy ireo ary nanamafy ity filohan'ny federasionina ity fa ho zaraina solosaina toy izao avokoa ny ligim-paritra manerana ny nosy. Vola azo avy amin'ny kitapom-bolan'ny federasionina ihany izany. Tonga nanome voninahitra izany fotoan-dehibe izany ny filoham-boninahitry ny kung-fu Wisa, Sylvain Rabetsaroana. Nanamafy ny Grand Maître Avoko fa hitohy ny fitetezam-paritra ho an'izy ireo ary hamafisina hatrany ny fampiakarana ny haavo teknikan'ny kung-fu Wisa izay efa manana sampana any Eoropa (Frantsa). Nentanina koa ny mpikambana kung-fu Wisa mba handray anjara eo amin'ny raharaham-pirenena amin' ny sehatra rehetra noho ny maha olom-pirenena malagasy azy ireo, hoy hatrany ny fampitam-baovao voaray.
J. Mirija