Toekarena

 teny am-pelatanan’ny mpandraharaha vato tsy ara-dalàna ny herinandro lasa teo, araka ny tatitra ofisialy navoakan’ny Ministeran’ny Harena an-kibon’ny tany sy ny Loharanonkarena Stratejika omaly. Nahitam-bokany indray ny hetsika tafiditra ao anaty ady amin’ny fitrandrahana sy fivarotana vato tsy ara-dalàna. Mitohy hatrany ny fanadiovana, fanatsarana ary fanavaozana apetraka, hoy io Minisitera io. Tsy tomombana ny antontan-taratasy manaporofo ny maha-ara-dalàna ny fitazonana ireo vato maro be ireo teo an-toerana rehefa nanatanteraka ny fisavana ny tompon’andraikitra, araka ny fanazavana. Mahatratra 47 karazana ary amin’ny endriny samihafa ireo vato tratra, ary eo am-panatanterahana ny tombam-bidin’ireo vato ireo ny tompon’andraikitra manam-pahaizana amin’izany ankehitriny. Olona ahiahiana miisa roa no voalaza fa voasambotra tamin’ity raharaha ity ary efa mandeha ny famotorana. Manoloana ny fandikan-dalàna izay mitranga dia nogiazana ireo vato ireo, eo am-piandrasana izay ho tohin’ny raharaha araka izay takian’ny lalàna. Ny Fitondram-panjakana ankehitriny dia tsy manaiky mihitsy ny gaboraraka amin’ny fitrandrahana tsy nahazoana alalana, ny fivarotana sy ny fikirakirana tsy manara-dalàna ireo harem-pirenena. Entaniny araka izany ireo izay liana amin’ny seha-pihariana harena an-kibon’ny tany, mba hanatanteraka izany ao anatin’ny sehatra ara-dalàna hatrany ka hanatona ireo biraom-paritry ny Ministera manerana ny Nosy, hoy ny Minisitra Rakotomalala Herindrainy Olivier. Nomarihin’ny Minisiteran’ny harena an-kibon’ny tany fa ny fitrandrahana, fivarotana, fanangonana, fitaterana, fanondranana, na izay endrika rehetra fikirakirana harena ankibon’ny tany dia misy ny lalàna mifehy izany sy mamaritra ny antontan-taratasy ahafahana manatanteraka ny asa manodidina izany. Andrasana ny ho tohin’ity raharaha ity na hangina na ho lasa lavitra. Hatramin’izay rahateo toa vitavita ho azy ny raharaha fanondranana harena sarobidy: volamena 73,5kg, 49kg, 22kg, Safira 925g,… ary efa nisy vato 8 kaontenera ihany koa aza nokasaina haondrana niala teto. “Mbola mandeha ny fanadihadiana” no valin-teny re matetika eto, indrindra fa misy olona ambony voatonontonona izay. Ampahany ihany itony tratra itony, fa tena manjaka ny fandrobana harem-pirenena eto.
Toky R