Seranantsambon’I Toamasina Isan’ireo mampiditra vola be indrindra

Hatreto, isan’ireo mbola mitana ny laharana voalohany amin’izany ny fadin-tseranana, indrindra fa ny seranantsambon’I Toamasina izay tantanin’ny SPAT (Société du Port à Gestion Autonome de Toamasina). Ny 85% amin’ny entana miditra eto Madagasikara, dia miainga ao Toamasina avokoa, izay manamafy fa mitana anjara toerana goavana ho an’ny toekarena Malagasy ny fisian’ny seranantsambo izay tantanan’ny SPAT, ary voasokajy ho orinasam-panjakana mamelona ara-bola ny Fanjakana. Raha ny antontan’isa navoakan’ny Fadin-tseranana tamin’ny volana novambra 2021, nahatratra 96% ny tahan’ny fampidiram-bola tao anatin’ny 10 volana voalohany tamin’ny taon-dasa, ka nampiditra 2462 miliara tany ho any, izany hoe manodidina ny 2500 miliara Ari izany tao anatin’ny herintaona, raha toa ka 25% kosa ho an’ny taona 2020 noho ny krizy ara-pahasalamana sy ara-toekarena niainan’izao tontolo izao. Voalaza moa, fa nanafatra Scanner miisa roa ny fadin-tseranana Malagasy nentina nanatsarana ny asa, ary efa am-perinasa nanomboka ny volana may 2022 teo, raha raisina amin’ny tetiandro nofaritana. Manafaingana ny famoahana entana io sy ny fikirakirana ara-panjakana samihafa ao amin’ny seranantsambo io.
Toky R