Filohan’ny fanavaozana

Tsy dia miditra loatra amin'ny asan'ny Fitsarana sy ny manodidina azy isika fa izaho indray dia manohana an'ilay hoe tsy azo henjehina ny mpikamban'ny HCC amin'ny fanapahan-kevitra izay raisiny ao amin'ny fivoriana izay ataon-dry zareo. Azo henjehina kosa izy raha misy fahadisoana nataony, na mikononkonona fanongam-panjakana, na misy zavatra nataony, na fahadisoana tany ivelany,...", hoy ny Filoham-panjakana Randrianirina Michael omaly mikasika ny raharaha HCC izay miteraka fifandroritana teo amin'ny HCC sy ny Minisitry ny Fitsarana. Ny HCC izay nampangain'ny mpitahiry fitombokasem-panjakana ho nisy ampahany nikasa handray ny fitorian'ny depiote Antoine Rajerison izay niampanga ny Fitondrana fanavaozana ho mandika sy manitsakitsaka ny lalàmpanorenana ka tokony hamindra ny fahefana amin'ny sivily. Nitondra valy bontana fa manitsakitsaka ny fahaleovan-tenan'ny Fitsarana sy ny fisaraham-pahefana ny fihetsiky ny Minisitry ny Fitsarana, ary tsy tokony ho azo henjehina amin'ny fanapahan-keviny mikasika adihevitra momba ny raharaha handraisany didy ny HCC. Nilaza tamin'ny alalan'ny Sekretera Jeneraliny Atoa Ranesa Firiana fa tsy voahaja ny tsiambaratelon'ny Fitsarana,... Nampangain'ny Minisitry ny Fitsarana ho mikononkonona fanakorontanana moa ireo mpikambana eo anivon'ny HCC sasany ireo ary miray tendro amin'ny mpanao politika izay efa misy ny nosamborina sy any am-ponja. Andrasana ny tohiny sy ny fanapahan-kevitra eo anatrehan'ny fifanenjanana. Halamina sa hakisaka ireo mpikamban'ny HCC miisa efatra?
Toky R