Tsy misy vidiny ve ny aim-bahoaka ?

olona maro be eto amin’ny Firenena noho ny fahapoizinana ara-tsakafo samihafa na ny teto Antananarivo na ny tany Ambositra na ireo toeran-kafa,… Iray volana mahery angarangidina tsy tena nisy zavatra nivaingana teo anatrehan’ny fitakiana hoe : inona no tena marina ? Tsongoy fon’olona, tsongoy fon-tena,… fa tena mangirifiry izany olona 4 mianaka izay ankohonana iray manontolo no indray namoy ny ainy, zanaka nirijarija mianadahy nindaosin’ny fahafatesana tao anatin’ny iray volana monja,… Tao anatin’izay vanim-potoana izay, karazan’ny very an-javony ny zava-drehetra, tsy hita izay tena marina, fa toa seraseram-panjakana tsy tonga volana, fanamarinan-tenan’ny mpitondra,… no betsaka sy misongadina. Tsy mijabaka amin’ny asan’ny Fanjakana, tsy manamaivana ny asa sy ny tsiambaratelon’ny fitsarana, tsy manenjika be fahatany ny mpitsabo izay tena manao ny ainy tsy ho zavatra ny ankamaroany,… fa kosa hoe : raha tena noheverina ho misy vidiny sy manan-danja ain’ireo olona lasibatra, raha tena nahomby tamin’ny lazaina fa efa miasa sy mandray andraikitra ny Fanjakana, mety mba betsaka ny zavatra voasoroka. Mampiahiahy ny tsy fisian’ny mangaraharaha, raha tsy hilaza afatsy ny filazana rehefa nangotraka ny raharaha hoe : laboratoara roa no nandefasana ny singa taorian’ny tatitry ny vaovao iraisam-pirenena fa laboratoara tsy tena manara-penitra no nandefasana azy. Marina fa Andriamanitra no mpandahatra, saingy betsaka ireo toe-javatra manimba saina amin’ny maha olombelona. Sanatria toa hamaivanina sy vitavita ho azy ny ain’ireo mpiray tanindrazana nafoy. Sanatria toa efa mangotraka ny raharaha, mandeha ny fampanenoana lakolosy, mihamafy ny fitakiana ny marina amin’ny alalan’ny fitoriana na mety ho hetsika samihafa, vao may ny endim-boanjon’ny Fanjakana. Dia lasa ihany ny saina aman’eritreritra hoe : tena hisy marina hipoitra ve sa sanatrian’ny vava fampanginana hisian’ny antoka amin’ny fandraisana fivoriana iraisam-pirenena hikatsaham-boninahitra sy sehoseho ivelany ?
Toky R